Валюта курси: Ўз.Р.Марказий банки
USD
АҚШ доллари
EUR
Eвро
RUB
Россия рубли
Sayt test rejimida ishlayapti!!!

Сўнгги янгиликлар






Олий Мажлис депутати Халқ таълими вазирлигини масъулиятни ўзидан соқит қилиб, уни маҳаллий Кенгашларга юклаб қўйишда айблади
12.09.2020 09:33,  
724

Олий Мажлис Қонунчилик палатаси депутати Дониёр Ғаниев Халқ таълими вазирлиги ва вазир Шерзод Шерматовни мактабларни очиш бўйича барча масъулиятни маҳаллий Кенгашларга юклаб қўйишда айблади.

"Маҳаллий Кенгашларнинг ошиб бораётган ваколати мактаблар очилиши бўйича тўғри қарор қабул қилишларига имкон беради. Лекин аслида ҳам шундайми? Ҳақиқатда ҳам амалиётда Маҳаллий Кенгашларда шундай қарор қабул қилиш ваколати борми?

Ҳаммамиз яхши биламизки Маҳаллий Кенгашлар раислари ўша ҳудудларнинг ҳокимлари ҳисобланади. Ҳокимлар учун эса Маҳаллий Кенгаш қарори асосида иш ташкил этиш эмас, балки юқоридан келган топшириқ ижросини таъминлаш муҳимроқ ҳисобланади. Шундай экан, фарзандларимиз ҳаёти, соғлиғига оид муҳим қарорни аслида ҳеч қандай ваколати, таъсир кучи йўқ Маҳаллий Кенгашлар ҳал қилади деб кимни алдаяпсиз, жаноб вазир? Ўзингизними ё жамоатчиликними?

 

Менга бу кўпроқ Халқ таълими вазирлиги томонидан масъулиятдан қочиш, эҳтимолий хатони олдиндан суғурталаш учун ўйлаб топилган бир тактикадек туюлмоқда. Чунки бугунги ноаниқ эпидемиологик вазиятда ўқув йилини анъанавий шаклда бошлаш ниҳоятда хавфли (рискли) қарор эканлиги ҳамда катта эҳтимол билан бу қарор ўзини оқламаслигини тахмин қилиш қийин эмас.

Шу боис, Халқ таълими вазирлиги ақлли «юриш» қилиб, масъулиятни ўз зиммасидан соқит қилиб, уни Маҳаллий Кенгаш депутатлари зиммасига юклашни маъқул кўрмоқда.

Умуман олганда, охирги пайтларда гўёки Маҳаллий Кенгашлар ваколатини ошириш фонида аҳоли эътирозларига энг кўп сабаб бўладиган муаммоли масалалар бўйича қарор қабул қилиш (масалан, ер участкаларини олиб қўйиш, маҳаллий бюджетни тасдиқлаш) ваколатини «қоғозда» Маҳаллий Кенгашларга бериш тенденцияси кузатилмоқда. Гарчи бу ўзгаришлар демократик жиҳатдан тўғри қадам бўлсада, лекин амалиётда бу муаммоларни ечилишидан кўра, уларни баттар газаклаб кетишига хизмат қилади, холос. Токи ҳокимлар бир пайтни ўзида Маҳаллий Кенгаш раиси вазифасини бажариш амалиётига чек қўйилмас ҳамда уларга ижро ҳокимияти органлари вакиллари бўлмаган номзодлар сайланмас экан, Маҳаллий Кенгаш ваколатларини ошириш бўйича амалга оширилаётган барча ҳаракатлар фақат қуруқ, баландпарвоз гап бўлиб қолаверади.

Мактаблар очилишига қайтадиган бўлсам, менимча, эпидемиологик вазият юқори чўққисига чиққан ёки чиқиб келаётган ҳудудлар (ҳозирда асосан водий вилоятлари)да бу қарор бироз кечиктирилиши, ҳеч бўлмаса ушбу ҳудудларнинг марказий, катта шаҳарларида мактаблар фаолияти ҳозирча йўлга қўйилмай туриши керак.

Чунки коронавирус ва пневмония инфекцияси билан касалланиш кескин ошиб бораётган бир пайтда, фарзандларимиз ҳаётини ёки улар инфекция ташувчи сифатида ёши катта, ҳамроҳ касалликлари бор оила аъзоларининг ҳаётини хавф остига қолдириш эҳтимоли мактабларни шошиб очишга арзимайди" - дейди Олий Мажлис депутати.

Тавсия этамиз






Тавсия этамиз

Ҳар доим хабардор бўлинг!

carzone.uz мобил иловаларини кўчириб олинг ва барча янгиликлар сиз билан