4 июн, пайшанба куни Тошкентдаги "Ўрикзор" савдо мажмуаси 14 кунлик карантиндан кейин қайтадан фаолият кўрсата бошлади, дея хабар беради Учтепа туман ҳокимлиги.
Истисно тариқасида "Стройгород" савдо мажмуаси ҳозирча очилмайди.
"Сўнгги бир неча кун давомида Учтепа тумани сектори раҳбарлари "Ўрикзор" савдо мажмуаси ҳудудида хавфсизлик чораларининг тайёрланишини кузатдилар", - дейилади хабарда.
Савдо марказида учта дезинфекция туннели, ижтимоий масофа белгилари, иссиқлик излари ва юк ташувчи автоуловлар учун махсус дезинфекция тўсиғи ўрнатилди.
Бундан ташқари, сотувчи ва харидор ўртасида махсус ажратгичлар ўрнатилиб, оғир эпидемия шароитида ўзини тутиш қоидаларини эслатувчи плакатлар бутун бозор ҳудудига осиб қўйилди.
Эслатиб ўтамиз, "Ўрикзор" савдо мажмуаси сотувчилардан бирида коронавирус топилганидан кейин 23 май куни вақтинча ёпилган эди. Кейинчалик касаллик унинг оиласи аъзоларида ҳам аниқланган.