9 июн, сешанба куни Ўзбекистон биринчи марта Қувайтга тиббий ниқобларни экспорт қилди. "Навоий" эркин иқтисодий зонаси аэропортидан махсус юк самолётида 450 минг долларлик 2,2 миллион ниқоб партияси Қувайтга етказиб берилди, дея хабар беради "Ўзтўқимачиликсаноат" уюшмаси ахборот хизмати.
Биринчи партия май ойи охирида Қувайтнинг Fursan Al Khaleej ширкати ва уюшма қошидаги "Енгилсаноатсавдо" МЧЖ ўртасида имзоланган 10 миллион долларлик шартнома асосида экспорт қилинди. Ниқоблар Қувайт Ички ишлар вазирлигининг буйруғи билан олиб келинган. Партиянинг бир қисми Қувайт Соғлиқни сақлаш вазирлигига топширилади.
"Импортни ташкиллаштириш тўғрисида қарор қабул қилишдан олдин, биз турли мамлакатлар, шу жумладан, Хитойнинг маҳсулотларини синчковлик билан ўрганиб чиқдик", - деди "Fursan Al Khaleej" президенти Жоҳид ал-Атаиш. Унинг сўзларига кўра, Ўзбекистон томонидан ишлаб чиқарилган маҳсулотлар сифати компанияга мос келади ва Fursan Al Khaleej тиббий буюмлар - ниқоблар, комбинезонлар, қўлқоплар ва бошқа ҳимоя воситаларига буюртма беришни аллақачон бошлади.
Ушбу жўнатма Ўзбекистон-Қувайт муносабатлари тарихидаги Ўзбекистондан Қувайт бозорига биринчи муҳим маҳсулот ҳисобланади, деди Ўзбекистоннинг ушбу мамлакатдаги элчиси Баҳромжон Алоев. Унинг сўзларига кўра, ҳозирда Қатар, Баҳрайн ва Ироқ бозорлари ўрганилмоқда.