13 май куни Шавкат Мирзиёев ва Садир Жапаров телефон орқали мулоқот қилди. Улар муқаддас Рамазон ҳайити муносабати билан бир-бирларини самимий қутлаб, биродар халқларимизга тинчлик, фаровонлик ва равнақ тилаб, эзгу истакларини изҳор қилди.
Иккитомонлама ва минтақавий ҳамкорликнинг бошқа масалалари қаторида Боткен вилоятидаги давлат чегарасининг қирғиз-тожик участкасида содир бўлган сўнгги воқеалар ҳам муҳокама қилинган.
Садир Жапаров мазкур ҳолатга шахсан эътибор қаратгани ва ўша вақтда Қирғизистон халқига кўрсатилган кўмак учун Шавкат Мирзиёевга миннатдорчилик билдирди.
Президентлар Қирғизистон-Ўзбекистон давлат чегарасидаги қолган участкаларини ҳуқуқий рўйхатга олиш юзасидан ҳам фикр алмашишди.
Шу куниёқ Шавкат Мирзиёев Тожикистон президенти Эмомали Раҳмон билан ҳам тожик-қирғиз чегарасидаги вазият барқарорлашгани ҳақида гаплашган.