Жорий йил ноябрь ойининг бошида Ўзбекистонда крипто-дўкон фаолиятини ташкил этиш тартиби белгиланган. Шундан сўнг мана шундай дўкон фаолиятини амалга ошириш учун лицензиялар бериш бошланди. Бунда истиқболли лойиҳалар агентлиги томонидан крипто-дўкон фаолиятини амалга ошириш учун “Crypto Trade NET” МЧЖ ва “Crypto Market” МЧЖларга биринчи лицензиялар берилган.
Мазкур агентлик томонидан яна битта крипто-дўкон фаолиятини амалга ошириш учун “Crypto EXPRESS"га лицензия берилди.
Тегишли маълумотлар лицензияларнинг электрон реестрига белгиланган тартибда киритилган ҳамда агентлик расмий веб-саҳифасида фойдаланиш учун очиқ ҳисобланади.
Крипто-дўкон фаолиятини амалга ошириш қоидалари қуйидагича:
Хусусан, крипто-дўконнинг электрон платформаси орқали:
- жисмоний шахслар томонидан банк ўтказмаларини амалга ошириш орқали крипто-активларни миллий валютада сотиб олиш ёки сотиш;
- чет эллик жисмоний шахслар томонидан банк ўтказмаларини амалга ошириш орқали крипто-активларни хорижий валютада сотиб олиш ёки сотиш.
Крипто-дўконнинг савдо объекти орқали эса:
- жисмоний шахслар томонидан банк ўтказмаларини амалга ошириш орқали крипто-активларни миллий валютада сотиб олиш;
- мижозлар томонидан крипто-активларни нақд пул кўринишида миллий ёки хорижий валютада сотиб олиш;
- мижозлар томонидан крипто-активларни фақат миллий валютада сотиш.
Крипто-дўконда мажбурий идентификациядан ўтказилмаган мижозлар билан амалга ошириладиган операциялар ҳамда Ўзбекистон резидентлари томонидан чиқарилган крипто-активлар билан операцияларни амалга ошириш тақиқланади.