Ўзбекистондаги барча талабаларга контракт бўйича 10 фоизлик чегирма берилади

Ўзбекистондаги барча талабаларга контракт бўйича 10 фоизлик чегирма берилади

Пандемия шароитида аҳолининг тўлов қобилияти пасайиши ҳисобга олиниб, фарзанди тўлов-шартнома асосида ўқийдиган оилаларга қатор енгилликлар берилди.

Олий ва ўрта махсус таълим вазирлиги пандемия даврида контракт нархлари борасида келиб тушган мурожаатларни инобатга олиб, Молия вазирлиги билан бирга таклифлар ишлаб чиқди. Унга кўра:

2020/21 ўқув йилида амалдаги базавий тўлов-контракт миқдори учун кундузги шаклда ўқийдиган барча талабаларга 10 фоиз чегирма берилади;

ОТМлар томонидан етим, чин етим, ногирон бўлган талабаларга ҳамда ижтимоий ҳимояга муҳтож, «темир дафтар» рўйхатидаги оилалар фарзандлари бўлган талабаларга контракт тўловларини қоплаш учун манзилли моддий ёрдам кўрсатилади. Бунда ОТМлар мавжуд маблағлари ҳисобидан талабаларнинг ижтимоий ҳолатидан келиб чиқиб, 4 млн сўмгача молиявий ёрдам кўрсатиш имкониятига эга бўлади;

Қуролли Кучлар сафида муддатли ҳарбий хизматни ўтаган ва ОТМларда тўлов-контракт шакли асосида ўқиётган 4 минг нафардан зиёд талабага шартнома миқдорининг 35 фоизини тўлаш орқали моддий ёрдам кўрсатилади. Ушбу моддий ёрдам бир талабага бир йилда 2,4 млн.сўмдан 3,4 млн.сўмгача миқдорни ташкил этади.

Қўшимча қилинишича, ОТМларда таълим олиш (ўзининг, 26 ёшга тўлмаган фарзандларининг ёки эрининг (хотинининг) таълим олиши) учун тўловларга йўналтириладиган, солиқ солиниши лозим бўлган иш ҳақи ва бошқа даромадлари даромад солиғидан озод қилинган бўлиб, бунда бир нафар талаба учун контракт тўлаган оилага бир йилда 770 минг сўмдан 1 млн 177 минг сўмгача маблағ даромад солиғидан имтиёз шаклида қайтади.

Тўлов-шартнома асосида ўқийдиган талабаларга шартнома шартларини бажаришда бериладиган чегирмалар ҳисобига давлат бюджетига ортиқча юк тушмаслиги учун олий таълим муассасаларида ўқув жараёнига тегишли харажатлар нормативлари қайта кўриб чиқилади ҳамда уларда қўшимча таълим хизматларни кўрсатиш ҳисобига бюджетдан ташқари маблағларни жалб қилиш орқали чегирма харажатларини қоплаш чоралари кўрилади.

Ҳуқуқшунос Хушнудбек Худойбердиевнинг маълум қилишича, ушбу 10 фоизлик чегирма стипендиясиз шаклдаги тўлов-контракт миқдорига нисбатан ҳисобланади.

Шунингдек, тўлов-контрактга 10 фоизлик чегирма фақат ДАВЛАТ олий таълим муассасаларига тааллуқли эканлиги айтилди.

Нодавлат ёки хусусий олий таълим муассасалари, масалан Вестминстер, Инха , Турин политехника, MDIS, Ёджу, AKFA, TEAM, Вебстер ва ҳ.к. шу каби бошқа ОТМлар тўлов-контракт миқдорини ўзи мустақил белгилайди ва уларда чегирма ёки бошқача тарздаги имтиёзлар бериш тартиби умуман бошқача. Шу сабабли ушбу чегирма ҳақидаги эълон уларга тааллуқли эмас.

Нодавлат ва хусусий ОТМлар чегирма ёки имтиёз бериш-бермаслигини олийгоҳ маъмуриятидан сўраб билиш мумкин.