Халқаро муҳожирлик ташкилоти ҳисоботида айтилишича, Россияда айни пайтда 11 миллиондан ортиқ муҳожир бор. Уларинг 3 миллион нафари Украина фуқаролари.
“Россия Федерацияси минтақадаги муҳожирларнинг диққатини жалб қиладиган энг муҳим мамлакат бўлиб қолмоқда. У 2019 йили 11,6 миллион муҳожирни қабул қилган. Уларнинг аксарияти қўшни давлатлардан, аниқроқ айтганда МДҲдан келган”, дейилади ҳисоботда. Унда кўрсатилишича, “Украинадан бўлган муҳожирлар хорижликларнинг энг катта гуруҳини ташкил этади – 3 мииллион нафардан ортиқ”. Ундан кейинги ўринларни Қозоғистон (2,5 миллион киши атрофида) ва Ўзбекистондан (1,1 миллион киши) бўлган муҳожирлар эгаллайди.
Ҳисобот муаллифлари қайд қилганидек, Россияга келган хорижликларнинг катта қисми меҳнат муҳожирларидир. Шунинг учун Россия Федерацияси дунёдаги энг йирик пул ўтказиш марказларидан бирига айланган – муҳожирлар ишлаб топган пулларини ватанларига жўнатади. “2018 йилда Россиядан бошқа давлатларга юборилган пул ўтказмалари миқдори 21 миллиард АҚШ долларини ташкил қилди. Бу ушбу мамлакатда секин-аста, аммо изчил равишда иқтисодий кўтарилиш бўлаётганини кўрсатади. Шунинг учун ҳам Россия меҳнат муҳожирларини жалб қилишда давом этяпти”, деб изоҳлайди Халқаро муҳожирлик ташкилоти (ХМТ).
Маълумотларни ўрганиш натижасида Россияда “катта сондаги украиналик қочқинлар” борлиги аниқланди: “2014 йил Украина шарқида бошланган зиддиятлардан буён 400 минг киши Россия Федерациясига келган ва уларнинг катта қисми қочқинлик мақоми ёки вақтинчалик бошпана олган”, дейди мутахассислар. Бундан ташқари, Россия “узоқ вақтдан бери Марказий Осиёдан чиққан меҳнат муҳожирлари учун етакчи йўналиш бўлиб қолмоқда”. 2019 йили мамлакатда Марказий Осиё давлатларидан келган муҳожирлар сони 5 миллион киши атрофида бўлди.
Бутун Европадаги муҳожирлар сони ҳозирда 82 миллион кишини ташкил этади. Уларнинг 13 миллиони Германияда (бу жиҳатдан немис диёри Европада етакчи); Франция ва Буюк Британияда 9,5 миллион нафар муҳожир бор; тахминан 6 миллион муҳожир Италияда ва Испанияда ҳам деярли шунча муҳожир яшайди. Европадаги муҳожирларнинг ярмидан кўпи (42 миллион киши) қитъанинг бошқа давлатларидан келганлардан иборат. Уларнинг ичида энг катта гуруҳ россияликлар (10 миллион кишидан ортиқ), кейинги ўринда Украина, Полша ва Буюк Британия туради.
Ҳозирда дунё бўйича жами 272 миллион нафар муҳожир бўлиб, бу сайёрамиз аҳолисининг 3,5%идир. 1970 йилдан буён бу рақам уч баравар ошган ва бугунга келиб Ер юзида ҳар 30 кишидан бири муҳожир ҳисобланади. Ҳар йили энг кўп муҳожирни АҚШ қабул қилади – 51 миллион киши. Иккинчи ўринда Германия, учинчи ўринда Саудия Арабистони, тўртинчи ўринда Россия туради. Муҳожирларнинг келиб чиқиш жойи бўйича Ҳиндистон етакчилик қилади. Ундан кейинги ўринлар Мексика, Хитой, Россия, Сурия ва Бангладешга тегишли.