2020 йилнинг 22 январь куни Халқаро валюта жамғармасининг (ХВЖ) “Халқаро молиявий статистика” ахборот-статистик тизимида Ўзбекистон Республикасининг саҳифаси очилди. Бу ҳақда Марказий банк матбуот хизмати ҳабар бермоқда.
Мазкур тизим ХВЖнинг асосий ахборот-статистик маълумотлар тармоғи бўлиб, унда ХВЖга аъзо 200 га яқин мамлакатларнинг иқтисодий, молиявий, ижтимоий ва бошқа статистик маълумотлари эълон қилиб борилади. Тизимда жойлаштирилган маълумотлар мамлакатлардаги ижтимоий-иқтисодий ҳолатни таҳлил қилишда халқаро экспертлар, молиявий институтлар ҳамда инвесторлар томонидан фойдаланиладиган муҳим манба ҳисобланади.
ХВЖнинг “Халқаро молиявий статистика” ахборот-статистик тизимидаги Ўзбекистон Республикаси саҳифасида мамлакатимиз бўйича муҳим ижтимоий-иқтисодий статистик кўрсаткичлар, шу жумладан, Ялпи ички маҳсулот, пул-кредит статистикаси, тўлов баланси, халқаро инвестиция позицияси, меҳнат бозори ва демография кўрсаткичлари ҳамда бошқа статистик маълумотлар даврий равишда эълон қилиб борилади.