Марказий банк Ўзбекистоннинг халқаро захиралари тўғрисидаги маълумотларни эълон қилди.
2022 йилнинг 1 июнь ҳолатига кўра, Ўзбекистоннинг олтин-валюта захиралари $35,4 млрд ни ташкил қилган. Таққослаш учун, бу кўрсаткич 2022 йил 1 май ҳолатига кўра, $35,9 млрд бўлган. Рақамлар ўтган бир ойда Ўзбекистоннинг расмий захиралари қарийб $400 млн га камайганини кўрсатмоқда.
Май ойи давомида олтиннинг физик ҳажми 11,1 млн троя унциядан 11,4 млн троя унцияга (тахминан 9,33 тонна) ошган бўлсада, қиймати $21,32 млрд дан $21,18 млрд га пасайган.
Шунингдек, захира активлари таркибидаги хорижий валюта захиралари ҳам $13,5 млрд дан $13,1 млрд га камайган.
«Ўзбекистон ялпи халқаро захиралари 2022 йил бошидан бери $264,5 млн га ёки 0,8% га ошди. Бунда олтин нархининг йил бошидаги $1799,25 дан $1854,4 гача ўсишининг таъсири $630 млн ни ташкил қилди», дейилади Марказий банк изоҳида.
Захиралар мамлакатнинг «хавфсизлик ёстиқчаси» ҳам ҳисобланади — улар салбий ташқи шок ҳолатларда зарбани камайтирувчи омил сифатида зарур. Халқаро ташкилотларнинг тавсияларига кўра, ривожланаётган давлатлар учун захиралар камида 3 ойлик импортни қоплаши керак.