«Ўзбектелеком» Credit Suisse AG'нинг Лондон филиалидан 200 миллион евро миқдорида кредит жалб қилади, бу ҳақда Ягона корпоратив ахборот порталидаги маълумотлардан маълум бўлди.
Бу ҳақдаги қарор компания акциядорларининг 16 июнь куни бўлиб ўтган навбатдан ташқари йиғилишида қабул қилинди.
Кредит Huawei Technologies компанияси билан мамлакатнинг шарқий минтақасида телекоммуникация инфратузилмасини янада ривожлантириш бўйича қўшма лойиҳани амалга оширишга йўналтирилади.
Шу йилнинг апрель ойида «Ўзбектелеком» кейинги йилнинг март ойида IPO'га чиқиши мумкинлиги маълум бўлди.