Янги Ўзбекистон, янги сайловлар... Очиғини айтганда, ҳаммаси бирдан ижобий томонга ўзгариши, жамиятда демократик қадриятлар бирдан порлаб кетишини кутмагандим. Тадрижий ривожланиш орқали мавжуд вазиятни яхши тарафга ўзгартириш мумкинлигини АОКА мисолида кўрмоқдаман.

Сайловолди тарғибот ишлари баъзан “қовун сайли”га айланиб кетса ҳам, бунга табиий қарадим. Негаки, ҳар қандай аҳмоқона фикрни сўз эркинлиги ё фикрлар хилма-хиллиги билан ниқоблаш мумкин. Аммо қонунбузарликка, ўта кетган кўзбўямачиликка жим қараб туролмайман.

Гап шундаки, сайлов ишларини ташкил этаётган Марказий сайлов комиссияси, жараёнга қисман кўмак бераётган ҳокимлик ва идоралар, сайлов ишида асосий ролни бажараётган партиялар бюджетдан маблағ олиб, яна халқни алдаши чидаб бўлмас тубанлик.

2012 йилдан буён ЎзЛиДеп партияси аъзоси бўлган Бобур Холматов аввалги сайловларда ҳам ўз партияси номидан иштирок этган. У партия бадалини мунтазам тўлаган, партия йиғилиш ва ташкилий ишларида фаол бўлган. Уни таниган яқинлари Бобурни тадбиркор, молиячи ва партиянинг жонкуярларидан бири, дея таъриф берди.

Бобур жорий сайловда ҳам Халқ депутатлари Учтепа тумани Кенгашига ўз партияси номидан депутатлик ўрни учун курашиш истагида эканини билдирган. Сайлов ўтказувчи Учтепа туман сайлов комиссиясининг рўйхатида у, негадир, “яшиллар” аъзоси, Экопартия номзоди сифатида кўрсатилган. У билан боғланиб, ҳолат юзасидан фикрини билишга интилдим.

“Очиғи, ўзим ҳам билмайман. Тумандаги 7-Ёнғоқ сайлов округидан номзодим кўрсатилган. Қолаверса, Экологик партия аъзоси ва шу партия номзоди сифатида рўйхатда турибман. Бу мени ажаблантиряпти”, дейди у.

“Ўзбекистон Республикасининг Сайлов кодекси” 91 моддаси, 6 хатбошида шундай дейилган:

“Сиёсий партиялар фақат ўз партияси аъзоларининг ёки партиясизларни депутатликка номзод этиб кўрсатади”.

Холматов Экологик партия сафига қўшилгани ёхуд ЎзЛиДеп таркибидан чиқиб кетгани ҳақида сўраб билдимки, у яқин орада сиёсий партиялардан бошқасига қизиқиш билдирмаган. Шунингдек, айни пайтгача ЎзЛиДеп аъзоаси сифатида фаолият олиб борган.

Масала юзасидан Марказий сайлов комиссияси муносабатини ўрганишга ҳаракат қилдим. МСК Ахборот хизмати вакилининг таъкидлашича, Сайлов кодексининг 19 ва 20 моддасига асосан, туман Кенгашига сайловларни ўтказиш туман сайлов комиссиясининг ваколатидир.

“Туман Кенгашига номзодларни туман сайлов комиссияси рўйхатга олади”, дейди вакил.

Экологик партия Ахборот хизмати ушбу масалада жўяли гап айтишдан тийилди. Қайтанга, партиянинг қуйи бўғини вакиллари билан вазиятни ойдинлаштиришни таклиф эта олди, холос.

Ана энди тўлиқ картинани кўз ўнгимизда гавдалантириш учун, соддароқ қилиб тушунтирай: бир неча йиллар ЎзЛиДеп аъзоси бўлган, қолаверса, жорий сайловда ҳам ўз партияси номидан иштирок этмоқчи бўлган шахс Экопартия номидан кўрсатилмоқда. Демак, шу участкадаги сайлов натижалари ҳеч кимни қизиқтирмайдими? Номзоднинг ким ва қайси партиядан эканлиги-чи? Бундай “рокировка”га кимнинг журъати етиб, исталган одамни “массовка” учун бошқа партияга ташламоқда?