ЎзРТХБда савдо ҳажми қарийб 8 фоизга ошди
27.06.2022 22:41,
7
Ўзбекистон Республика товар-хом ашё биржасида (ЎзРТХБ) 20—26 июнь кунлари савдолар ҳажми 3,3 триллион сўмни ташкил этди, бу ўтган ҳафтага нисбатан 7,6 фоизга кўпдир, деб хабар беради савдо майдончаси матбуот хизмати.
Биржа операциялари умумий ҳажмнинг 66,5 фоизини, кўргазма-ярмарка савдолари – 0,3 фоизини, давлат харидлари – 33 фоизини, автомобиль рақамларининг онлайн аукционлари – 0,2 фоизини ташкил этди.
Ушбу даврда кичик бизнес ва хусусий тадбиркорлик субъектлари иштирокида тузилган битимларнинг умумий ҳажми 638,1 миллиард сўмни ташкил этди.
Давлат харидлари бўйича онлайн ўтказилган тендерлар натижасида бюджет ва корпоратив буюртмачилар томонидан 77,3 миллиард сўм тежашга эришилди.