Пашинян Туркияни “арман геноциди” ни давом эттиришда айблади

Пашинян Туркияни “арман геноциди” ни давом эттиришда айблади

Арманистон Бош вазири Никол Пашинян Тоғли Қорабоғда бўлиб ўтаётган воқеаларни Туркиянинг геноцид сиёсатининг давоми деб атади. Бу ҳақда у Ҳиндистоннинг WION телекомпаниясига берган интервюсида айтиб ўтди, деб ёзади РИА Новости.

"Мен Тоғли Қорабоғда содир бўлаётган воқеалар ва туркларнинг борлиги Туркиянинг арманларга нисбатан геноцид сиёсатининг давоми деб биламан. Маълумки, XX асрнинг бошларида, хусусан 1915 йилда, арманларнинг қирғини Усмонийлар Туркиясида юз берган. дунёнинг кўплаб давлатлари томонидан тан олинган ва натижада жуда катта ҳудудларда этник тозалаш амалга оширилган", - деди Пашинян.

Унинг сўзларига кўра, "Туркия 100 йил ўтиб, арманларга қарши геноцид сиёсатини давом эттириш учун Жанубий Кавказга қайтиб келди".

"Бунинг ўзига хос прагматик мақсади бор. Чунки Жанубий Кавказдаги арманлар Туркиянинг жанубий, шарқий ва жануби-шарқдаги империалистик сиёсатини давом эттириш йўлидаги сўнгги тўсиқдир. Ва шу нуқтаи назардан, ҳа, Тоғли Қорабоғ аҳолиси экзистенциал таҳдидга дуч келмоқда ва биз муаммони ҳал қилишнинг энг тўғри ва амалий усули "нажот учун ажралиб чиқиш" формуласидан Тоғли Қорабоғ арманлари хавфсизлигини таъминлаш учун фойдаланиш деб ўйлаймиз", - деди Арманистон Бош вазири.

Унинг сўзларига кўра, Туркия ушбу жараёнда иштирок этишини яширмайди. "Туркиянинг юқори мартабали мулозимлари Озарбайжонни жанг майдонида қўллаб-қувватлашларини ва Туркия қуролли кучлари вакиллари ва Туркия ҳарбий техникалари, хусусан Bayraktar (Байроқдор) учувчисиз самолётлари, уларнинг ўнга яқинини Тоғли Қорабоғнинг ўзини ўзи ҳимоя қилиш кучлари томонидан уриб туширилганлиги Туркиянинг бевосита алоқаси борлигидан далолат беради. Шунингдек, Туркия Суриядаги ёлланма аскарлар ва террорчиларни ёллаши ва уларни можаро зонасига ўтказаётганига оид далиллар мавжуд", - дея таъкидлади Пашинян.

Пашинян, шунингдек, Туркиянинг Қорабоғдаги ҳаракатлари НАТОга бир оз масъулият юклашини айтди. "Туркия НАТО аъзоси ва менимча, Тоғли Қорабоғга қарши урушда Туркия томонидан қилинган ҳаракатлар НАТО зиммасига маъсулиятни юклайди".

Унга кўра, Human Rights Watch ташкилоти "Озарбайжон Қорабоғ можароси зонасида тақиқланган қуроллардан, хусусан кластерли бомбалардан фойдаланаётганини қайд этди, бу халқаро ҳуқуқни қўпол равишда бузмоқда".

"Ва НАТОга аъзо давлат ушбу жараёнда иштирок этганда, НАТОга аъзо мамлакат тоғли Қорабоғга қарши уруш бошлаш учун можаро зонасига ёлланма аскарлар ва террорчиларни юборганида, бу НАТОнинг бевосита жавобгарлиги билдиради ва НАТО бу саволларга жавоб бериши керак", - деди Пашинян.

Никол Пашинян. Фото: gov.am

 

Арманистон ва Озарбайжон 30 йилдан буён ҳудудий низоларни давом эттираётган Тоғли Қорабоғдаги жанглар 27 сентябрда бошланди. Томонлар бир-бирини жанговар ҳаракатлар ва провокатсияларни бошлаганликда айбламоқда.

Боку ва Ереван икки марта Москва воситачилиги билан сулҳ эълон қилди, аммо ҳар сафар жанговар ҳаракатлар қайта тикланди. 25 октабрда томонлар учинчи марта оташкесим эълон қилинди, бу сафар АҚШ воситачилиги қилди. АҚШ, Арманистон ва Озарбайжоннинг қўшма баёнотида айтилишича, сулҳ битими 26 октабр куни Тошкент вақти билан соат 9:00 да кучга кирди.