Польша Миллий банки раҳбари Адам Глапиньский мамлакатда техник таназзул юзага келиши мумкинлигини тан олди. Бу ҳақда «ТАСС» хабар бермоқда.

«Польшада мен рецессияни кутмайман, техник рецессия бўлиши мумкин, ЯИМ икки чоракда салбий ўсишга эга бўлиши мумкин, аммо бу ҳали рецессия эмас», деди Глапиньский . Унинг прогнозларига кўра, мамлакатда инфляция ёзда энг юқори чўққисига чиқади, кейин эса аста-секин пасайишни бошлайди.

Ўсиш глобал инфляцион шокларнинг сақланиб қолиши, шунингдек, электр ва газ тарифларининг ошиши билан боғлиқ бўлади. «Бироқ, талаб омилларининг таъсири келгуси йилда заифлаша бошлайди ва инфляция прогноз уфқининг охирида мақсадли даражанинг юқори чегарасига қайтади», деб хулоса қилди Глапиньский.

Май ойи натижасида Польшада нархларнинг ўсиши 24 йил ичида энг юқори кўрсаткич бўлди. Дастлабки маълумотларга кўра, май ойида истеъмол нархлари индекси ўтган йилнинг шу даврига нисбатан 113,9 фоизни ташкил этди. Нархларнинг энг катта ўсиши ёқилғи сегментида қайд этилган.