Президент Шавкат Мирзиёев 25 октябрь куни «Ўзбекистон Республикаси Президенти фаолиятининг кафолатлари тўғрисида»ги қонунга қўшимча киритиш тўғрисидаги қонунни имзолади.
Қонунга киритилган 1−1 моддага кўра, президент Ўзбекистон Республикаси Президентининг белгиси ва штандартига (байроғига) эга бўлади.
Маълумот ўрнида, штандарт — махсус турдаги байроқ. Хорижий давлатларда у президентлик белгиси (рамзи) ҳисобланади. Штандарт (байроқ) президент иштирок этадиган барча муҳим тадбирларда, инаугурация (қасамёд қабул қилиш) пайтида ҳамда президент қароргоҳларининг бинолари ва хизмат хоналарида кўтарилади.
Президент белгиси — президентнинг фарқловчи расмий белгиси. Бу белги президентлик лавозимига сайланган шахсни ўз лавозимига юклатилган оғир вазифаларни самарали амалга оширишида халқ ва жамият томонидан билдирилган ишонч белгиси сифатида хизмат қилади.