Қирғиз Республикаси президенти Сооронбай Жээнбеков истеъфо берди

Қирғиз Республикаси президенти Сооронбай Жээнбеков истеъфо берди

Қирғиз Республикаси президенти Сооронбай Жээнбеков бугун 15 октябрь куни мамлакатда юзага келган сиёсий ҳолат юзасидан аҳолига мурожаат қилди.

Мурожаатда президент Бишкекда сиёсий ҳолат ҳамон кескин қолаётганини, ҳар томонлама ихтилофлар тинчимаётганини таъкидлади.

"Мен учун Қирғизистондаги тинчлик, мамлакатнинг бир бутунлиги, халқнинг жипслиги ҳаммасидан устун. Ҳар бир ватандошимнинг ҳаёти мен учун қадрли.

Мен ҳокимиятда қололмайман. Қирғизистон тарихида ўз халқига ўқ отган ва қон тўккан президент сифатида қолишни истамайман. 

Шунинг учун истеъфо беришга қарор қилдим", деди Жээнбеков.

Қирғизистонда Жапаров бош вазир этиб тайинланганидан кейин ҳам норозилик ҳаракати тинчимади. Жээнбеков сиёсатчилардан одамларни кўчадан олиб кетишни сўради.

Бир кун олдин бош вазир этиб сайланган Жапаров Жээнбеков билан музокара ўтказди ва уни истеъфога чиқишга чақирди. 

Президент истеъфога чиқарилган тақдирда, унинг ваколатлари, Қирғизистон Конституциясига мувофиқ, парламент раисига ўтказилади.