Аввал хабар қилганимиздек, «Қуръони Карим – Мусҳафи шариф»нинг навбатдаги нашри «Ҳилол» нашриётида бугун 11 январдан сотувга чиқарилди.
Мусҳафи шарифнинг нархи 35 минг сўм бўлиб, унинг онлайн савдоси фақат вилоятлар учун йўлга қўйилган.
Islom.uz порталининг хабар беришича, бугун эрта тонгдан «Hilol nashr» нашриёт-матбаа босмахонаси олдида яна одамлар гавжум бўлиб, Мусҳафи шарифнинг навбатдаги нашри сотиб олишган.
Хабарда айтилишича, ушбу нашр Исмоил Муҳаммад Содиқ раҳбарлигидаги «Hilol-nashr» нашриёт-матбааси ва Мозин Абдулқодир Арнаут раҳбарлигидаги «Ғавсоний» нашриёти ўртасидаги ҳамкорлик доирасида, ушбу нашриётнинг расмий рухсати ва аслий нусхаси асосида Ўзбекистон мусулмонлари идораси билан ҳамкорликда нашрга тайёрланди.
Тошкентда Мусҳафни «Hilol» нашриёт-матбааси бош дўкони, Кўкча ва Чорсу филиалларидан сотиб олиш мумкин.
Эслатма: Мусҳафи шариф онлайн савдода 11 январ 10:05 тугади.
Шунингдек, Мусҳафи шариф нашриётнинг бош дўконида, Кўкча ва Чорсу филиалларида, Наманган, Андижон ҳамда Самарқанд филиалларида соат 12:00 га қадар сотувда тугади.