Ўзбекистон томони Европа Иттифоқи бозорларига кенг турдаги экспорт товарларини, шу жумладан янги ва қайта ишланган мева-сабзавот маҳсулотларини етказиб беришни оширишга тайёр. Нариги томон эса “GSP+” тизими доирасида 6 мингдан ортиқ Ўзбекистон товарларини бож тўловисиз Европа Иттифоқи ҳудудига олиб киришга тайёрлигини билдирди. Бу ҳақда ташқи ишлар вазирлиги матбуот хизмати хабар бермоқда.
12 ноябрь, сешанба куни ташқи ишлар вазири Абдулазиз Комилов Белгиянинг Брюссель шаҳрида Европа Иттифоқининг қишлоқ хўжалиги бўйича комиссари Фил Ҳоган билан учрашди.
Учрашувда иқтисодиётни либераллаштириш борасида Ўзбекистонда амалга оширилаётган ислоҳотлар мамлакатга Европа бизнеси ва сармоясини кенг жалб қилиш учун кўпроқ имкониятлар очаётгани таъкидланди.
Шу муносабат билан тариф ва тарифсиз тўсиқларни бартараф этиш, стандартлаштиришнинг Европа тизимларини киритиш, сертификатлаш ва сифатни бошқариш истиқболларига алоҳида эътибор қаратилди.
Ўзбекистонга “GSP+” тизими доирасида 6 мингдан ортиқ товарларни бож тўловисиз Европа Иттифоқи ҳудудига олиб киришга ёрдам беришга тайёрлиги учун Европа томонига миннатдорчилик билдирилди.