Reuters учта манбага таяниб, Хитой КХДРга врачлар ҳам кирган мутахассислар гуруҳини юборди дея хабар бермоқда. Агентлик маълумотига кўра, бу Шимолий Корея лидери Ким Чен Иннинг саломатлигидаги муаммолар билан боғлиқ.
Агентликнинг тасдиқлашича, 23 апрель куни КХДРга Хитой Коммунистик партиясининг Марказий комитети халқаро бўлими юқори даражали вакиллари жўнаб кетган.
Эслатиб ўтамиз, Жанубий Кореянинг Daily NK газетаси Ким Чен Ин 12 апрель куни юрак-қонтомир касалликлари бўйича операция қилингани ҳақида хабар қилган эди. Шимолий Корея лидерида касаллик кўп чекиш, семириш ва чарчоқ оқибатида келиб чиққан.
CNN ҳам КХДР раҳбарининг саломатлиги яхши эмаслиги ҳақида хабар берди. АҚШ президенти Доналд Трампнинг таъкидлашича, Шимолий Корея лидерининг саломатлиги ёмонлашгани ҳақидаги хабар тўғри эмас.