Интернетнинг ўзбек сегментига яхши таниш бўлган риштонлик блогер ва халқ кутубхонаси ташкилотчиси Дилшод Болтабоевнинг бозордаги кутубхонаси туманда ободонлаштириш ишлари кетаётганлиги сабабли бузиб ташланган эди.
Кейинроқ Дилшод Болтабоев туманда янги қурилаётган бозор ҳудудидан ер ажратишларини сўраб, туман ҳокимлигига мурожаат қилди. Бу мурожаат қаноатлантирилиб, катта йўл бўйидаги гавжум жойдан 56 кв.метрли майдон ажратилди. Дилшоднинг кутубхонаси, замонавий тилда айтганда бук-кафеси енгил конструкциядан ишланади. Эътиборлиси, бу гал иншоот ҳокимликнинг тегишли қарори билан мустаҳкамлаб қўйилди.
Дилшод Болтабоевнинг ёзишича, 13 октябр куни Халқ шоири ва сенатор Иқбол Мирзо Риштонга келиб, бўлажак кутубхонанинг биринчи ғиштини ўз қўли билан жойлаштирди.
(Фото: Дилшод Болтабоевнинг Facebook саҳифасидан)