Р. Кушербаев яна "Uzavtosanoat" ҳақида: "Проста" без эмас, сал бет бўлиши керак

Р. Кушербаев яна

Депутат Расул Кушербаев айрим монополистлар, хусусан, боқиманда «Uzavtosanoat» таркибидаги корхоналарга берилаётган имтиёзлар жамиятдаги ижтимоий кайфиятга салбий таъсир ўтказаётгани ҳақида яна бир бор тўхталиб ўтди.

"Имтиёзлар иқтисодиётда ҳалол рақобатнинг йўқолиб, истеъмолчиларга танловсиз, сифати паст маҳсулот ва хизматлардан мажбуран фойдаланишга олиб келиши мумкин.

Афсуски, сўнгги вақтларда айрим монополистларга берилаётган алоҳида устун ҳуқуқлар аҳоли ижтимоий кайфиятига салбий таъсир ўтказмоқда.

Чунки аҳоли шу соҳада ўзи истаган сифатли, арзон маҳсулот ва хизматдан фойдалана олмаяпти. Булар қаторига боқиманда «Ўзавтосаноат» таркибидаги корхоналарга берилаётган имтиёзлар ҳам киради.

Ўзбекистон Республикаси Президентининг «Махсус саноат зонаси «Андижон вилояти саноат хаби»ни ташкил этиш чора тадбирлари тўғрисида»ги ИД-26203 (В-1) қарори лойиҳасида кўзда тутилган имтиёзлар шундай хулосага олиб келяпти: ҳалол ва тенг шароитда ишлашга ишонган корхона ўз мақсадларига Президент номидан фойдаланиб эришмайди.

Лойиҳадаги тоқат қилиб бўлмас вазият: айрим юртдошларимиз иложсизликдан бир парча суғориладиган ерда «ўзбошимча», деб топилаётган бошпаналарининг бузилишидан ҳадиксираб кун ўтказаётган бир вақтда узоқ йиллар шоҳона имконият ва имтиёзлар қуршовида яшаган «Uzavtosanoat»га (Саноат хаби) яна 100 гектарлик суғориладиган ер майдони беғараз берилмоқчи. 5-6 сотихмас, 100 гектар.

Кулгилиси, озиқ-овқат хавфсизлигига «ўзбошимча» уй қуриб яшаётган камбағал аҳоли хавф соляпти, деб бонг урамиз, камбағални қийнаймиз.  Юзлаб гектар суғориладиган ерларни эгаллаётган монополистлар эса оппоқ, идеал.

Бу ҳам етмагандек ҳамма ерни ауксион орқали олса, «Uzavtosanoat» аукционсиз олмоқчи.

«Проста» без эмас, сал бет бўлиши керак.

Яна бир гап «Ўзавтосаноат» таъсис этадиган корхона 100 гектар ердан ташқари 2023 йил 1 январга қадар импорт қилинадиган қурилиш материаллари, ускуналар, қурилиш техникаси, бутловчи буюмлар, эҳтиёт қисмлар, металл конструксияларини хориждан олиб келишда божхона тўловларидан озод бўлмоқчи. Яна имтиёз…

Умид қиламанки, адолатли, кучли фуқаролик жамияти қуриш йўлида кетаётган бир вақтда «бир тўда» кўзга кўринмас шахсларнинг лоббизми эканлиги кўриниб турган бундай лойиҳа қабул қилинмайди" деб ёзади Кушербаев.