Bloomberg: Россия расмийлари ва экспертларининг прогнозларига кўра, Россия иқтисодиёти 2021 йил даражасига ўн йиллик охирига қараганда эртароқ қайтиши даргумон.
Россия узоқроқ ва чуқурроқ рецессияга дуч келиши мумкин, чунки АҚШ ва Европа санкциялари мамлакат иқтисодиёти учун йиллар давомида таяниб келган тармоқларга таҳдид солади. Бу ҳақда Bloomberg 5 сентябр, душанба куни Россия ҳукумати учун тайёрланган ички ҳисоботга таяниб ёзмоқда.
Агентлик маълумотларига кўра, амалдорлар ва экспертлар Украинага бостириб кириши муносабати билан "Россиянинг иқтисодий яккаланиши ҳақиқий таъсирини баҳолаш" мақсадида бир неча ойлар давомида ишлаган ҳужжат мансабдор шахсларнинг оммавий баёнотларидан кўра "аниқроқ ҳолат"ни кўрсатади.
Ҳисоботда келтирилган учта сценарийдан иккитаси 2023 йилда ялпи ички маҳсулотнинг пасайиши тезлашишини ва иқтисодиёт фақат ўн йиллик охирида ёки ундан кейин урушдан олдинги даражага қайтишини кўрсатади. "Инерцион" сценарий иқтисод келаси йил пастга тушишини ва 2021 йилга нисбатан 8,3 фоизга пасайишини назарда тутади. "Стресс" сценарийсига кўра, ЯИМнинг максимал пасайиши 2024 йилда кутилмоқда - ўтган йил даражасидан 11,9 фоизга паст.
Барча сценарийлар санкциялар босими ортиб бораётганини инобатга олади, уларга кўпроқ мамлакатлар қўшилиши мумкин. Ҳукумат ҳисоботида айтилишича, Европанинг Россия нефть ва газидан кескин чекиниши Кремлнинг ўз бозорини таъминлаш қобилиятига путур етказиши мумкин.