БМТ Бош котиби Антониу Гутерришнинг “Россия томонидан аннексия қилинган Қримда инсон ҳуқуқлари ҳақида”ги маърузаси жорий йилнинг ёзида эълон қилинган эди. Бироқ унинг тақдимоти 14 октябрь куни, БМТ Бош Ассамблеясининг Учинчи қўмитаси йиғилишида бўлиб ўтди, дея хабар бермоқда Deutsche Welle.

Украинанинг халқаро ташкилотдаги доимий вакили ушбу фурсатдан фойдаланиб, йиғилганларнинг эътиборини БМТ раҳбарининг маърузасида Россия тўртинчи Женева конвенциясини бузгани қайд этилганига қаратди. Сўз, хусусан, Москванинг Қримдаги аҳоли таркибини атайин ўзгартиришга уринаётгани ҳақида борган.

“Маърузада айтилишича, Россия ўз аҳолисининг яриморолга кўчишини қўллаб-қувватлаяпти, бу эса Женева конвенцияларининг тўғридан-тўғри бузилиши ва Қрим демографиясини ўзгартиришга уринишнинг очиқ белгисидир”, – деди Украинанинг БМТдаги доимий вакили Владимир Ельченко.

Украина ваколатхонаси матбуот котиби Олег Николенконинг Фесбукдаги саҳифасида ёзишича, Россия ҳукумати “оккупацияга рози бўлмаганлар”ни Қримдан кўчишга мажбурлаяпти. 2014-2018 йилларда эса Қримга 140 мингдан зиёд россиялик кўчириб келинган, бу яриморол аҳолисининг 5 фоизи демакдир.

“Россиянинг барча қилмишлари қайд этиб бориляпти ва булар Москвани жавобгарликка тортишда, жумладан, келгуси резолюциялар ва халқаро судларда ишлатилади”, – деди Николенко.