Самарқанддаги «1000 та жўжа спектакли» муаллифи – маҳалла раиси лавозимидан озод этилди

Самарқанддаги «1000 та жўжа спектакли» муаллифи – маҳалла раиси лавозимидан озод этилди

Пастдарғомда «1000 та жўжа боқиб, камбағалликдан қутулган йигит» маҳалла раисининг ўғли, туман прокурори эса шу «спектакл» муаллифларидан бири бўлиб чиққани ҳақида хабар берилганди. Маҳалла ва оилани қўллаб-қувватлаш вазири Раҳмат Маматов бошчилигида Самарқанд вилояти Пастдарғом тумани «Қўқони» маҳалла фуқаролар йиғинида туман маҳалла ҳамда аҳоли вакиллари иштирокида 9 август куни бу масала бўйича учрашув ўтказди. Бу ҳақда вазирлик хабар берди.

Фото: Маҳалла ва оилани қўллаб-қувватлаш вазирлиги

Учрашувда «Kun.uz»да эълон қилинган «Қўқони» маҳалла фуқаролар йиғини раиси Ҳусниддин Турсуновнинг маҳалладаги камбағал оилаларга кўрсатилаётган ижтимоий ёрдам намунаси сифатида ўз уйида боқилаётган 1000 дона жўжани ҳамда камбағал оила вакили сифатида ўз ўғли – Достон Тиркашевни кўрсатгани баён этилган мақолада кўтарилган масалалар ўрганилиб, муҳокама этилган.

Раҳмат Маматов бу ҳақида ўз фикрини билдириб, вазифаларни бажаришда масъулиятсизлик қилган ҳар бир масъул ходимга нисбатан тегишли чора кўрилишини айтиб ўтди.

Фото: Маҳалла ва оилани қўллаб-қувватлаш вазирлиги

Учрашувда «Қўқони» маҳалла фуқаролар йиғини раиси Ҳусниддин Турсунов ўз аризасига кўра эгаллаб турган лавозимидан озод этилгани маълум қилинди.

Фото: Маҳалла ва оилани қўллаб-қувватлаш вазирлиги

Шунингдек, Пастдарғом тумани Маҳалла ва оилани қўллаб-қувватлаш бўлими бошлиғи М. Санақуловага ўз фаолиятида йўл қўйган камчиликлари учун ҳайфсан интизомий жазо чораси берилган.