Валюта курси: Ўз.Р.Марказий банки
USD
АҚШ доллари
EUR
Eвро
RUB
Россия рубли
Sayt test rejimida ishlayapti!!!

Сўнгги янгиликлар






Samsung ходимлари қанча маош олишади?
17.08.2022 19:36,  
581

 Samsung қандай пайдо бўлган?

 

Samsung Group (Samson Group) корпорация – бу 1938 йилда ташкил этилган, Жанубий Кореянинг энг йирик корпорацияларидан бири. Жаҳон бозорида юқори технологияли компонентлар ишлаб чиқарувчиси сифатида танилган, шу жумладан интеграл микросхемалар, телекоммуникация ускуналари, маиший техника, аудио ва видео қурилмаларнинг тўлиқ циклини ишлаб чиқаришга ихтисослашган.

Жанубий Кореянинг Геонганг-до провинциясининг шимолий қисмида жойлашган Даегу шаҳарчасидаги омборхоналарнинг бирида 1930 йилларда Кореялик тадбиркор Ли Бён Чхоль гуручли ун ишлаб чиқариш бўйича ўз бизнесини йўлга қўяди.

Samsung асосчисининг ўғли, Samsung Group компаниясининг ҳозирги раиси Ли Кун Хи ҳисобланади

Ўша пайтда Корея Япониянинг мустамлакаси бўлганлиги боис, мамлакатда хусусий тадбиркорлик билан шуғулланиш анча қийин эди. Бироқ, 1938 йилда Ли Кореядан Хитой ва Маньчжурияга экспорт қилиш учун биринчи мустақил канални яратишга муваффақ бўлди. Гуруч, шакар ва қуритилган балиқ каби озиқ-овқат маҳсулотларини етказиб беришнинг фаол ривожланиши савдо компаниясининг маркасини расмий рўйхатдан ўтказиш имконини берди.

Ли Бён Чхоль компаниясини “Samsung” дея номлади. Бу сўз келиб чиқишига кўра, корейс тилидаги “Samson” яъни “Уч юлдуз” деган маънони англатади. Ҳозирда ушбу номни Samsung асосчиси Ли Бён Чхоль ўзининг уч ўғли шарафига номлагани эътироф этилади.

Хорижда Samsung номининг пайдо бўлиши кореялик тадбиркорнинг узоқни кўзлаган ва улуғвор режалари натижасидир дейиш мумкин. 1950 йилларнинг охирига келиб Ли Бюнг Америка қитъаси мамлакатлари билан савдо-сотиқ қилишни режалаштира бошлади. Муросага келингач гуруч ароқ ва пиво ишлаб чиқарадиган завод маҳсулотлари иттифоқ кучлари вакилларига сотила бошланди. Бироқ кутилмаганда Кореядаги уруш бу бизнесга чек қўйди. Омборлар талон-тарож қилинди ва компаниянинг асосий манбалари ёқиб юборилди.

Аммо баъзи миш-мишларга кўра ана шундай тало-тўп вазиятда ҳам Ли Бюнг янги бизнеси учун мўлжаллаб йиғиб қўйган маҳфий қутидаги пулларини сақлаб қола олган. Мазкур маблағлар кейинчалик тўқимачилик фабрикаси, шакар заводи ва суғурта бизнеси учун тамал тоши бўлиб хизмат қилган. Шу тариқа Ли Бюнг 1960 йилларда Кореяда жон бошига ўртача даромад 80 АҚШ долларидан ошмаган бир пайтда у ўз бизнесини қайта йўлга қўйиб тезда бойиб кетади.

Шуни таъкидлаш керакки, ўша пайтда, ҳатто пойтахт Сеулда ҳам доимий электр ва сув таъминоти мавжуд эмас эди. Бутун мамлакат учун кунига бир неча соат электр энергияси берилди халос. Яқинлашиб келаётган ҳарбий тўнтариш эса, Ли Бюнг ва унинг бизнесига ўз таъсирини кўрсатмай қолмади.

Хусусан, Ли Бюнгни Корея президенти Ли Сын Ман билан яқин доирада дўст бўлганлиги сабабли порахўрлик айби билан тахтдан ағдарилган президент билан қамоққа олишади.

 

Корейс урушидан кейинги Samsung компанияси

 

Урушдан сўнг Жанубий Кореянинг янги президенти генерал Пак Чон Хи мамлакат иқтисодини кўтариш долзарб вазифа эканлигини яхши англарди. Шу боис, ҳокимиятни қўлга киритиши билан саноат ва иқтисодий ислоҳотларни бошлаб юборди. Хусусан мамлакатда иқтисодиётнинг саноат секторини ривожлантириш дастури ишлаб чиқилган бўлиб унга мувофиқ, АҚШ билан яқин иқтисодий алоқалар ўрнатилиши, мамлакат ички маҳсулотларини АҚШга экспорт қилиниши ҳамда мамлакат зарур ҳолларда чет эл кредитлари ола билиши лозим эди. Шунга кўра, йирик сармоядорларга хом ашё, замонавий технологиялар, асбоб-ускуналар ва бошқа яқин ўн йил ичида Кореяни саноатлашган давлатга айланишига хизмат қиладиган маҳсулотларини сотиб олишга руҳсат этилган эди.

Жанубий Кореянинг биринчи президенти Син Mан Ли

Кореялик ислоҳотчилар барқарор иқтисодиёт катта ташвишларга таяниши керак, деган хулосага келишди, аммо уларни имкон қадар тезроқ яратиш керак эди, шунинг учун Кореядаги энг таниқли ишбилармонларга давлат кредитлари ва кредитлар берила бошланди.

Улар давлат буюртмалари билан таъминланди, баъзи ҳуқуқий ва солиқ имтиёзлари кичик корхоналарнинг иқтисодиётнинг турли соҳаларида тадбиркорлик фаолияти билан шуғулланадиган компанияларни ўз ичига оладиган, юридик компаниялар бирлашмасига яъни йирик конгломератларга айланишига имкон берди. Муваффақиятли тадбиркорлар қаторида Ли Бён Чхоль ҳам бор эди.

Шундай қилиб, 30 та йирик компаниялар сараланди баъзилари ташкил этилди. Улар орасида Samsungдан ташқари бугунги кунда ҳам муваффақиятли фаолият олиб бораётган “Daewoo”, “Hyundai”, “Gold Star” (LG) каби компаниялар ҳам бор эди.

 

Samsung қандай ислоҳ қилинди?

 

Шу каби сабабларга кўра, Жанубий Корея иқтисодиёти йилига 6 фоиздан 14 фоизгача тез суръатларда ривожланишга эришди. Ушбу даврда экспортнинг ўсиши 30 фоизни ташкил этди. Шундай қилиб, 1969 йилда Samsung маиший электроника ва яримўтказгич маҳсулотларини ишлаб чиқарадиган “Sanyoкорпорацияси билан бирлашгач оқ ва қора рангда кўрсатувчи телевизорларни ишлаб чиқара бошлади. Ўша пайтлари бу телевизорларни сотиб олишга Корея аҳолисининг атиги 2 фоизинигина қурби етган халос.

Sanyo ва Samsung бирлашуви Samsung Group компаниясининг энг катта тармоқларидан бири – Samsung Electronics компаниясини ташкил этилишига турки бўлди. Компания катта йўқотишларга қарамай, 1980 йиллардаги иқтисодий инқироздан омон қолди. Бироқ инқироз бир нечта филиаллар сонининг кескин камайишига олиб келди.

Компания бошқарувига Ли Бён Чхолнинг ўғли Ли Гон Хининг келиши компания тузулмасига ҳам ўзгаришлар олиб келди. Янги раҳбарнинг нуқтаи назарига кўра компания эркин савдо тўғрисидаги қонун талабларига тўла мос келиши керак эди. Ташқи инвесторларга нисбатан сиёсатни ўзгартириш бўйича таклифлар компаниянинг субсидиялар учун жозибадорлигини ошириш лозим эди. Чунки, шу даврга келиб конгломерат компанияларга давлат имтиёзларни бекор қилган ва у компаниялар мамлакатнинг молиявий ёрдамидан мосуво бўлган эди.

 

Samsung логотипининг каромати

 

80-йилларга қадар концернга тегишли компанияларнинг акциялари фақат Жанубий Корея ҳудудида муомалада бўлган, аммо уларга инвесторлар томонидан қизиқиш жуда кам эди. Сабаби, анъанавий равишда Конфуцийчилик тамойилларига асосланган Осиё бошқаруви кенгашининг бошида фақат Ли оиласининг вакиллари турар эди. Шу боис, компанияни бошқариш соҳасидаги қарорларни қабул қилишга ташқи сармоядорларнинг таъсир этиш кучлари умуман йўқ эди. Бундан ташқари, анъанавий менежмент бу – Ли оиласи учун умрбод ўша лавозимда фаолият юритиш дегани эди.

Замон талаби ва тушиб кетган акциялар қиймати компанияга маркетингга ихтисослашган мутахассислар киритилишига туртки бўлди. Шундан сўнг, компаниянинг дастлабки бошланғич логотипида катта қизил юлдуз тамғаси пайдо бўлди. Бироқ бу кўпчиликни манзур бўлмади. Samsung раҳбарияти қайсидир маънода логотипни ўзгартириш корпорация фаолиятини яхшилашига кўмак беришига ишонишарди.

Шу тариқа кўндаланг овал ичида компания номи ёзилган динамик усулдаги кўк эллипс рамз пайдо бўлди. Ажойиб дизайн ва кенг қамровли реклама кампанияси ўз вазифасини бажарди. Логотип дунёдаги энг таниқли бўлган брендлардан бирига айланди.

Янги эмблемани ишлаб чиқишда Шарқ фалсафаси тўлиқ эмас эди. Компания вакилларининг сўзларига кўра, “логотипнинг эллиптик шакли янгиланиш ва такомиллаштириш ғоясини ўзида ифода этувчи глобал космосдаги ҳаракатни англатган”. Логотипдаги ушбу ўзгариш 90-йилларга қадар давом этди. 2015 йилда фақатгина компаниянинг кўк рангда ёзилган номи сақланиб қолди халос.

 

XXI асрда Samsung

 

1983 йилда Samsung компаниясида шахсий компюьтерлар ишлаб чиқарила бошланди. 1991-1992 йилларда шахсий мобил қурилмалар ва мобил телефонларни биринчи ишлаб чиқаришни ривожлантириш ишлари якунланди. Ва ниҳоят, 1999 йилда Forbes Global Magazine Consumer Electronics (Форбес халқаро журнали истеъмолчилари электроникаси) мукофоти Samsung Electronics компаниясига топширилди.

Шу ўринда компаниянинг телекоммуникация бозорида муваффақиятини таъкидлаш лозим. 2008 йилнинг учинчи чорагида Samsung ўзининг асосий рақобатчиси – “Motorola Inc”ни ортда қолдириб, АҚШда уяли телефонлар савдоси бўйича биринчи ўринга чиқиб олди. Сўнгра, Европада ҳам “Nokia Corporation”ни ўйиндан чиқариб юбориб, бутун қитъада биринчи ўринни эгаллади.

2015 йил август ойида Samsung Жанубий Кореяда Samsung Pay хизматини ишга туширди. Ушбу восита инсониятга илк бор NFC – near field communication (дала алоқаси яқинида) маълумот узатишни қўллаб-қувватловчи бренднинг етакчи смартфонлари ёрдамида тўловларни амалга оширишга имкон берди. Бу хизмат Россия ва Марказий Осиёга 2016 йил сентябрь ойида кириб келди.

2016 йил 2 август куни Samsung Galaxy Note 7 смартфонини тақдим этди. Бироқ, 2016 йил сентябрь – октабрь ойларида Samsung телефонни сотишни тўхтатди ва сотилган телефонларни қайтариб ола бошлади. Бунга Samsung Galaxy Note 7 смартфонинг қувват тошидаги ҳаддан ортиқ қизиб кетиши ва портлаши сабаб бўлди.

2010-йилларда Samsungнинг маҳсулотлар қатори Gear Fit 2 фитнесс билагузук ва Gear IconX симсиз минигарнитуралар каби янги маҳсулотлар билан тўлдирилди ва 2016-йил 18-ноябрда Samsung Gear S3 ақлли соатларини чиқарди.

2018 йил апрел ойида Samsung ички бозорда янги Galaxy G2 Pro моделини – 2G ёки 3G ни қўллаб-қувватлаш учун модулларга эга бўлмаган ва Wi-Fi тармоқларига уланиш имкониятига эга бўлмаган смартфонни тақдим этди. “Смартфон” нинг мақсадли аудиторияси – Интернет туфайли эътиборнинг тарқалишига йўл қўймаслик учун маҳаллий талабалар.

 

Гуруҳ таркиби ва молиявий ҳолати

 

Interbrand consulting компанияси томонидан ҳар йили ўтказиладиган маркетинг тадқиқотларига кўра, 2018 йил якунларига кўра Samsung умумий бренд қиймати бўйича 6-ўринда эгаллаган.

Samsung гуруҳига тегишли компаниялар электроника ва микроэлектроника, кимё саноати, қурилиш, автомобилсозлик, оғир саноат, молия-кредит ва суғурта соҳаларига тегишли. Концерн таркибига электронларни ишлаб чиқаришни, ресурсларни ажратиб олишдан, уларни қайта ишлашдан тортиб, тайёр маҳсулотларгача бўлган тўлиқ цикл киради. Кўпгина конгломерат бўлинмалари тўғридан-тўғри тайёр электрон маҳсулотлар ишлаб чиқариш билан шуғулланувчи компанияларга бўйсунадиган функцияларни бажарадилар ва фақат консерн ёки фақат Жанубий Кореяда ишлайди.

Бу хусусият фойдани бўлинмалар бўйича тақсимлашдан яққол кўриниб турибди, шунинг учун концерннинг асосий даромади электроника саноатига тўғри келади.

 

Samsung – электрон саноат

 

Компаниянинг электрон саноат бўлимлари бутун дунё бўйлаб кенг тарқалган Жанубий Кореяда (1981), Венгрия (1990), Малайзия (1995), Буюк Британия (1995), Мексика (1998), Хитой (1998), Бразилия (1998), Словакия (2002), Ҳиндистон (2001), Ветнам (2001), Таиланд (2001), Испания (2001), Россия (2008) мамлакатларида расмий офеслари мавжуд.

Сеулнинг чеккасидаги бош корхона сифатли дисплейлар ишлаб чиқариш билан шуғилланади. Ушбу корхонада 6 та сигма бошқарув тизими жорий қилинган. Бу ерда улар янги моделларни ишлаб чиқадилар, синовдан ўтказадилар, маҳсулотларнинг биринчи сериясини яратадилар ва муваффақиятли амалга оширилгандан сўнг улар дунёдаги фабрикалар ўртасида янги товарларни ишлаб чиқариш учун юкларни тақсимлайдилар.

 

Samsung – кимё саноати

 

Samsung кимё саноатигабешта корхона киради:

– Samsung Total Petrochemicals (халқаро компаниялар, Total Group билан қўшма корхона);

– Samsung нефть кимёси;

– Samsung нозик кимёвий моддалари;

Samsung Bp Chemicals Co., Ltd. (халқаро компания, Bp Chemicals билан қўшма корхона).

Ушбу саноат ҳар йили қарийб 5 миллиард АҚШ доллари миқдоридаги даромадга эга. Samsung Total Petrochemical – кимё саноатидаги энг йирик компания бўлиб, у Samsung Group ва французларнинг Total Group компаниялари билан ҳамкорликда энергия ва кимё соҳасида фаолият олиб боради. Нефть-кимё комплекси Жанубий Кореянинг Daesang шаҳрида жойлашган 15 та заводдан иборат бўлиб, уларда маиший кимё (кукунлар, геллар ва бошқалар), умумий кимё, асосий кимёвий моддалари ишлаб чиқарилади. Хусусан:

– полиетилен

– полипропилен

– стирол мономери

– параксилен

– LPG – Liquified Petroleum Gas(Суюлтирилган нефть гази) ёқилғи

Йилига 5 миллион тонна нефть-кимё маҳсулотлари экспорт қилинади. Таъкидлаш жоизки, ушбу корхоналарда маҳсулот ишлаб чиқаришнинг экологик хавфсизлиги соҳасидаги ISO халқаро сифат менежменти стандартларига жавоб қаътий назорат қилинади.

 

Samsung – оғир саноати

 

Samsung оғир саноати соҳасида концерннинг иккита бўлинмаси мавжуд:

Биринчиси – Samsung Heavy Industries;

Иккинчиси –Hanwha Techwin(Samsung Techwin);

Ушбу оғир саноатдан келадиган маблағ Samsung корпорациясининг 10 фоизини ташкил қилади. Чунки бу икки оғир саноат компаниялари асосан Жанубий Кореянинг ички бозорида ишлайди.

Ушбу бўлим фаолиятининг асосий йўналишларига:

Кемасозлик, қурол ишлаб чиқариш, нефт ва газ қувурлари ётқизиш ва танкерлар қуришни киритиш мумкин. Бунданг ташқари, катта лойиҳалар орасида Samsung КТХ2 – кўп мақсадли жанговар тайёргарлик самолётини, К9 ўзиюрар артиллерия улкан гамбитини, дунёдаги энг катта суюлтирилган газ баллонини ва Хин Лос-Анжелес контейнер кемасини киритиш мумкин.

 

Samsung Engineering компанияси муҳандислиги

 

Samsung Engineering бу дунё бўйлаб Samsung Group корпорацияси учун офислар ва фабрикалар қуриш билан шуғулланади. Ушбу саноат ҳар йили 2 миллиард долларга яқин қурилиш ишларини амалга оширади. Аммо компания камдан-кам буюртмаларини бажаради. Бироқ ушбу компания томонидан қурилган иншоотлар бутун дунёга машҳурлиги билан ажралиб туради. Жумладан, Сеулдаги Samsung кутубхонаси, Бирлашган Араб Амирлигидаги 828 метрли (дунёдаги энг баланд) Бурж Халифа биноси, Малайзия пойтахтидаги 451,9 метрли Petronas Towers эгизак биноси, Тайвондаги Тайпей 101 – 101 қаватли, 509,2 метрли кўп функцияли осмонўпар бино ҳамда “Лахта маркази” – Санкт-Петербургдаги “Газпром” ОАЖнинг штаб-квартираси шулар жумласидан. 

 

Samsung автомобилсозлик саноати

 

Консерннинг нодавлат бўлинмаларидан бири бу автомобилсозлик саноатидир. Ушбу соҳада Samsungнинг битта компанияси яъни 2000 йилда асос солинган Renault Samsung Motors шуғулланади. Шу пайтгача компания қуйидаги моделларни ишлаб чиқарган.

Моделлар:

Samsung QМ3

Samsung SM3

Samsung SM5

Samsung SM7 ва бошқалар шулар жумласидан. Бу соҳада 2008 йилга қадар компания фақат ички бозорни таъминлаган. Компаниянинг молиявий бўлинмаси йилига қарийб 42 миллиард доллар даромад келтиради. Шу билан бирга, у асосан концернга молиявий хизматлар билан шуғулланади ва Жанубий Корея ҳудудида ишлайди.

 

Samsung Life Insurance фаолияти

 

Samsung Life Insurance – активлар ҳажми бўйича Жанубий Кореядаги энг йирик суғурта консалтинг компанияси ҳисобланади. У 10 миллиондан ортиқ мижозларга хизмат кўрсатади. Ушбу ташкилотнинг активлари 100 триллион Корея Республикаси вонини ташкил этади.

Samsung Life Insurance – миллий маълумот ва кредитни баҳолаш бўйича ААА кредит рейтингида биринчи ўринни қўлга киритган. Fortune журнали маълумотларига кўра, компания дунё бўйлаб суғурта компаниялари орасида 18-пағонани эгаллаб турибди.

 

Samsung енгил саноати

 

Тўқимачилик ишлаб чиқарувчиси сифатида 1954 йилда ташкил этилган Samsung Cheil Industries компанияси Жанубий Корея бозорида мода саноатининг етакчисига айланган. Шунингдек, компания кимёвий материаллар, синтетик қатронлар (АБС, ПС) ва яримўтказгичли дисплейларни ишлаб чиқариш учун бирикмалар яратади. Компания “Bean Pole”, “Galaxy”, “Rogatis” va “LANSMERE” каби замонавий Кореянинг кийим-кечак брендларини ишлаб чиқаради.

 

Samsung Groupнинг маркетинг ва реклама компанияси

 

Samsung Groupнинг маркетинг ва реклама билан шуғилланувчи компанияси “Cheil Сommunications” 1973 йилда ташкил этилган. Унинг хизмат турларига жамоатчилик билан алоқалар, пиар (PR), оммавий ахборот воситалари билан алоқалар, маркетинг тадқиқотлари, бозорни ўрганиш соҳаларида тўлиқ хизматларни тақдим этадиган маркетинг компанияси, Жанубий Кореяда реклама соҳасида шубҳасиз етакчи ҳисобланади. Бўлим Samsung Groupни маркетинг қўллаб-қувватлаш муаммоларини тўлиқ ҳал қилади, унинг офислари 24 мамлакатда жойлашган.

 

Samsung Everland ва Shilla Hotels & Resorts

 

Ўйин-кулги ва ҳордиқ соҳаси конгломератида Samsung Everland ва Shilla Hotels & Resorts меҳмонхоналар ва дам олиш масканлари тармоғи корпорация ходимлари ва мижозлар учун хизмат қилишади.

Everland Resorts Сеулнинг чеккасида жойлашган Жанубий Кореядаги энг йирик кўнгилочар мажмуа ҳисобланади. Shilla Hotels & Resorts – бу Taj Hotels Resors ва Palaces (Ҳиндистон) билан стратегик иттифоқдаги беш юлдузли меҳмонхоналар тармоғидир. Shilla Hotels & Resorts дунёдаги энг яхши меҳмонхоналар ўнталигига киритилган.

 

Samsung Groupнинг ҳомийлик ва хайрия фаолияти

Samsung корпорацияси спорт соҳасига ҳам ҳомийлик қилиб келади. Ҳатто ўзининг профессионал футбол жамоаси Suwon Samsung Bluewings, Samsung Lions – бейсбол жамоаси, Seul Samsung Thunders– баскетбол жамоаси, Samsung Bichumi баскетбол бўйича аёллар жамоаси, Samsung Bluefangs волейбол жамоалари мавжуд.

Спорт ҳаракатини қўллаб-қувватлашнинг бир қисми сифатида Samsung Олимпия ўйинларининг расмий ҳомийси сифатида фаолият олиб боради. Хусусан, Samsungнинг Олимпия ҳаракатидаги иштироки 1988 йилда, Сеулдаги Олимпия ўйинларининг миллий ҳомийси бўлган пайтдан бошланган. 1998 йилда Нагано қишки Олимпия ўйинларидан бери компания Бутунжаҳон Олимпия Ҳамкорлари Гуруҳига қўшилган. Жумладан, Сочидаги 2014 йилги қишки Олимпия ўйинларининг, 2016 йил Рио-де-Жанейродаги ёзги Олимпия ўйинларининг ҳамда Пхёнчхандаги 2018 йил Қишки Олимпия ва Паралимпия ўйинларининг расмий ҳомийси ҳисобланади. Samsung Electronics 2005 йилдан бери “Челси” футбол клубининг асосий ҳомийси ҳисобланади.

Бундан ташқари, 2003 йилда таъсис этилган “Ясная Поляна” адабий мукофотининг ҳаммуассиси ҳисобланади. Бу Россиядаги энг нуфузли адабий мукофотлардан бири бўлиб, у Л.Толстойнинг ахлоқий ва ғоявий издошларига ҳамда рус маданиятининг кўп асрлик анъаналарини ўзида ифода этувчи гуманистик наср ва шеърият муаллифларига топширилади.

Шунингдек, бугунги кунда Samsung Калуга, Ленинград, Ростов, Самара, Омск, Нижний Новгород, Свердловск вилоятлари, Краснодар ва Красноярск ҳудудларидаги 32 та болалар уйлари ва интернатларига молиявий ва моддий-техник ёрдам кўрсатиб келади.

 

“Samsung IT” мактаби ва “IоT Samsung” akademiyasi ҳақида

 

Россиянинг 20 дан ортиқ шаҳарларини қамраб олган кундузги бепул таълим ўрта мактаб ўқувчилари учун йиллик бепул қўшимча дастур ҳисобланади.

Дастур Android OS операцион тизимидаги мобил қурилмалар учун IT ва Java дастурлаш асосларини ўргатади. Samsung ушбу лойиҳани 2014 йилдан буён амалга ошириб келади. Корпорация мазкур лойиҳаси учун кўплаб мукофотларга, шу жумладан “Фан ва таълим” номинациясида 2016 йил Runet мукофотига сазовор бўлган.

2017 йилда ушбу дастур Қозоғистонда кенг тарқалди. Samsung Олмаотада ўрта мактаб ўқувчилари учун coding-lab дастурий мактабини очди. Тренинг умумтаълим мактабларининг 8-11-синф ўқувчилари учун мўлжалланган бўлиб, Ал-Форобий номидаги Қозоғистон Миллий Университетида ўтказилади.

Бундан ташқари, IT ўқув йўналишлари бўйича университет талабалари учун ҳар йили IоT технологиялари бўйича танлов ўтказилади. Дастур саноат ҳолатларини ўрганишга асосланган ва ўз қурилмасининг прототипини ишлаб чиқишни таъминлаши кўзда тутилган.

 

Samsungнинг молиявий жанжаллари

 

2007 йилда Samsung адвокатларининг собиқ раҳбари Ким Ёнг Чул у корпорация раиси Ли Гон Хи номидан пора бериш ва ёлғон гувоҳликлар бериш билан шуғулланганлигини маълум қилган. Кимнинг сўзларига кўра Samsung бошқарув кенгаши аъзолари адвокатларни Лини ҳимоя қилиш учун “уйдирма саҳналар” уюштиришга ўргатмоқда. Ким оммавий ахборот воситаларига Samsungнинг икки бошқарувчиси айбдор деб топилган ишни кўриб чиқаётган судяга 3,3 миллион доллар пора беришдан бош тортгандан уни четлаштиришганлигини маълум қилган.

2017 йил февраль ойида Samsung Group раҳбари Жей Ли йирик коррупция можаросига алоқадорликда айбланиб ҳибсга олинган эди. Ли ҳукумат буюртмасини олиш учун президент Пак Кин Хега яқин мансабдор шахсга пора берганликда айбланган. Прокуратура Лини активларни чет элга ўтказиш ва ёлғончиликда айбламоқда. Пак Кин Хенинг президентлик ваколатлари 2016 йил 9 декабрда Жанубий Корея парламентида ўтказилган импичмент овоз беришидан кейин тўхтатилди.

 

Samsung монополияси

 

“Корея кўпчилик Samsung раисини Жанубий Корея президентидан ҳам кучлироқ деб ўйлашади. Кореяликлар Samsungни енгилмас ва қонундан устун деб билишади",-дейди Вашингтон Постда таниқли иқтисодий онлайн радио эгаси Ли Хун Сук.

2012 йил 9 декабрда Жанубий Кореяда, “Samsung Республикасида” сарлавҳаси остида, танқидий мақола эълон қилинган бўлиб, унда Samsung кичик бизнесни қандай қилиб ишдан чиқариши, ўз нархларини белгилаш учун бошқа гигант корхоналар билан ўзаро тил бириктириши ҳамда бу орқали корейс истеъмолчиларининг танловини чеклаб қўйиши ва баъзида ҳақиқатни билиб олишга уринганларни қўрқитиб масалани бости-бости қилиши ҳақида фикрлар келтирилган.

Мақоланинг индаллосида дебатлар пайтида Кореянинг президентлигига номзод Ли Чон Хининг фикрларидан иқтибос келтиради. “Ҳукумат Samsungнинг қўлида. Samsung ҳуқуқий дунёни, матбуотни, олимларни ва бюрократияни бошқаради”.

Тайваннинг “Адолатли савдо комиссияси” Samsung ва унинг Тайван реклама агентлиги томонидан ёлғон реклама тўғрисидаги ишларни тергов қилган. Бу иш Комиссияга реклама агентликлари Samsung Electronics компаниясининг онлайн-форумларида рақибларига ҳужум қилиш учун ёллаганлиги тўғрисида шикоятлар келиб тушганидан кейин бошланди. Samsung ўзининг Facebookдаги саҳифасида ҳеч қандай эксперт хулосаларига халақит бермаслиги ва онлайн-маркетинг кампанияларини тўхтатиши, онлайн форумларга реклама ёки жавоблар ёзиши тўхтатиши ҳақида эълон қилди.

 

Samsung Electronics – 2022 йил биринчи чорак натижаларини эълон қилди

 

Samsung Electronics 2022 йил 30 июнь куни якунланган иккинчи чорак учун молиявий натижаларни эълон қилди. Унга кўра, компания 77,2 триллион Жанубий Корея вони (58 600 619 000 АҚШ доллари) миқдоридаги консолидацияланган даромадни эълон қилди, бу иккинчи чоракдаги рекорд кўрсаткич ва операцион фойда 14,1 триллион Жанубий Корея вонини ташкил этган. Қайд этиш жоизки, бу кўрсатгич ўтган йилга нисбатан 12 фоизга ошганлигидан далолат.

Уяли алоқа бизнесида даромадлар биринчи чорак охирида савдоларнинг пасайишига қарамай, ўтган чоракка ва ўтган йилга нисбатан ошди. Даромаднинг яхшиланиши Galaxy S20 флагманларининг ишга туширилиши ва маркетинг харажатларини самарали бошқариш билан маҳсулотнинг яхшиланиши натижасида содир бўлди.

Иқтисодий ноаниқликлар хавфи остида, Компания бозор ҳолатини диққат билан кузатиб бормоқда. Ҳар бир минтақага мослаштирилган самарали маркетинг ва реклама акцияларини инвестициялаш ва унинг логистикасини оптималлаштириш орқали салбий таъсирни камайтиришга эътиборини кучайтирмоқда.

 

Samsungга қандай қилиб ишга жойлашиш мумкин?

 

Агарда Кореяга бориб Samsung компаниясига ишга кирмоқчи бўлсангиз, бу бироз қийинчилик тўғдириши мумкин. Чунки, у ерда корейс тилини мукаммал билишингиз талаб этилади. Шунинг учун ишга жойлашмоқчи бўлган чет эл фуқаролари биринчи ўринда ТОПИКдан имтиҳон топширишади. Бундан ташқари халқаро инглиз тилини баҳолаш тизими IELTSдан юқори баллар олган бўлишингиз талаб этилади. Агар мазкур имтиҳонлардан аълога топширган бўлсангиз ҳам қувонишга шошилманг. Бу шунчаки дебоча халос. Энг муҳими IT соҳасининг етук билимдони бўлишингиз ва буни уларга исботлаб беришингиз талаб этилади.

Ҳозирда у ерга ишга жойлашишнинг энг оммабоп усули компаниянинг расмий веб-саҳифаси орқали мурожаат қилиш ҳисобланади. Ўша жойдан сўралган ҳужжатларнинг электрон нусҳаларини топширасиз. Расмий веб-сайтдан қачон ишга ёлланиш бўйича саралаш жараёни бошланишини ва жавоблар қачон эълон қилинишини билиб оласиз. Бу маълумотни Samsung карьералари ҳаволаси орқали олишингиз мумкин.

Агар эътиборга олинадиган бўлсангиз, суҳбат 4-5 босқични ўз ичига олиши мумкин.

 

Samsung корпорациясидагилар қанча маош олишади?

 

2022 йил 23 майдаги ҳисоботга кўра, Samsung компаниясида бир ходимнинг энг юқори маоши йилига 170 минг долларни ташкил қилади. Ўртача ҳисобда эса, корпорация ўз ходимларига йилига ўртача 97 764 доллар миқдорида маош тўлайди.

Шунингдек, Samsungдаги маошлар ходимнинг компанияда тутган нуфузи ва бажарган вазифасига қараб тақсимланади. Жумладан, Катта дастурий таъминот муҳандиси лавозимидагилар йилига ўртача 54 365 доллардан 170 465 долларгача, Жараён муҳандиси унвонига эга бўлган ходимлар эса ўртача йиллик маоши 90 831 доллардан 136 686 долларгача маош олишади.

Илмий унвонга эга катта муҳандиснинг Samsung компаниясида ўртача йиллик иш ҳақи 134,361 АҚШ долларини ташкил этади. Шу билан бир қаторда “Муҳандис-технолог” унвони билан ишлайдиганларнинг даромади ўртача йиллик иш ҳақи 81,796 долларни ташкил қилади.

АҚШдаги Samsung Electronicsда энг кам ойлик олувчи Material Handler (Моддий ишлов берувчи) лавозимида фаолият юритувчилар учун ўртача иш ҳақи йилига тахминан 24,155 доллар атрофида. Мобил маҳсулотлар менежери учун тўлов йилига 185 803 доллар миқдоригача. Samsung Electronicsнинг энг кам бир соатлик тўлов пакети соатига 8,74 долларни, Test Engineer (Синов муҳандиси) штати учун соатига 72,46 долларгача миқдорни ташкил этади.

 

Тўпловчи ва таржимон Абдулла ЧИМИРЗАЕВ

 

 

Ушбу мақолани тайёрлаш жараёнида қуйидаги манбалардан фойдаланилди.

 

news.samsung.com расмий веб-сайти

ru.wikipedia.org – очиқ энциклопедияси

www.quora.com

www.payscale.com

www.indeed.com

 

Тавсия этамиз






Тавсия этамиз

Ҳар доим хабардор бўлинг!

carzone.uz мобил иловаларини кўчириб олинг ва барча янгиликлар сиз билан