Сардоба аҳолиси учун уй қурамиз деб катта миқдорда пул йиққан фирибгарлар аниқланди

Сардоба аҳолиси учун уй қурамиз деб катта миқдорда пул йиққан фирибгарлар аниқланди

Сирдарё вилоятида Сардоба фожеасини пешава қилиб шахсий ҳисоб рақамига 41 милиондан ортиқ маблағ жамлаган фирибгарлар ушланди. Бу ҳақида ИИВ хабар бермоқда.

"Ижтимоий тармоқларда олиб борилган тезкор суриштирув ишлари натижасида “Диққат ҳайрия – Сардобада уй қурамиз” деб фуқаро Д.Ж номига “Davrbank”дан очилган пластик картасига 2020 йилнинг 02 май кунидан 08 май кунига қадар 41 679 708 (қирқ бир миллион олти юз етмиш тўққиз минг етти юз саккиз) сўм миқдоридаги пул маблағлари йиғилганлиги аниқланди. Ҳозирда ушбу ҳолат бўйича суруштурув ишлари олиб борилмоқда", - дейилган хабарда. 

Шу сабабли Сирдарё вилояти ИИБ фуқаролардан ижтимоий тармоқ ва бошқа жойларда текширилмаган маълумотлар орқали ҳайрия қилинг, уй қурамиз, ёрдам берамиз деб бонг ураётган айрим фирибгарларга ишонмасликка чақирган.

Эслатиб ўтамиз, 1 май куни Сирдарёда содир бўлган фавқулодда ҳолатдан сўнг 70 мингда ортиқ аҳоли эвакуация қилинган эди. Шундан сўнг бутун Ўзбекистондан жабрланганларга ёрдам акцияси бошланиб кетди. Барча маҳалла, ташкилот ва бошқа уюшмалар ўз қамрови асосида маблағ, озиқ-овқат, кийим-кечак, ўқув қуроллари ва китоблар жамлай бошлади. Хайрия ёрдамлари вилоят ва шаҳарлар бўйича бир жойга тўпланиб марказлаштирилган тартибда Сирдарё вилоятига етказиб берилди.