Саудия Арабистони ҳукумати хорижий фуқаролар учун Умрага бориш учун рухсат берди. Бу ҳақда Саудия Арабистони ИИВнинг SPA давлат ахборот агентлигида чоп этилган хабарида айтилган.

Ҳужжат мамлакат соғлиқни сақлаш идоралари билан келишилган ҳолда тасдиқланган ва уч босқичда амалга оширилади. Хорижий давлатлар фуқаролари "кичик ҳаж" сафарига шу йилнинг 1 ноябридан бошлаб боришлари мумкин.

Биринчи ва иккинчи босқичларда, 2020 йил 4 октябрдан бошлаб Саудия Арабистони фуқароларига муқаддас жойларни зиёрат қилишга рухсат берилади. Бундан ташқари, санитария меъёрларига мувофиқ, зиёратчилар сони кунига 6 минг кишидан ошмаслиги керак.

Таъкидланганидек, зиёратчилар сони 1 ноябргача, яъни учинчи босқичга қадар кўпаяди. Бу вақтга келиб, барча санитария қоидаларига мувофиқ, ҳар куни хорижий мамлакатлардан 20 минггача зиёратчилар муқаддас жойларга боришлари мумкин бўлади.

2020 йил феврал ойи охирида коронавирус тарқалиши сабабли Саудия Арабистони ҳукумати кичик ҳаж амалларини бажариш учун чет мамлакатлардан киришни вақтинча тўхтатган эди.

Маълумотларга кўра, ҳар йили дунёдаги 2,5 миллионга яқин мусулмонлар Ҳаж мавсумида Исломнинг зарурий устунларидан бирини амалга ошириш учун Саудия Арабистонига жўнайди.