Сингапур компанияси Тошкентда чиқиндилардан ўғит ишлаб чиқариши мумкин

Сингапур компанияси Тошкентда чиқиндилардан ўғит ишлаб чиқариши мумкин

Фото: Яндекс

Тошкент шаҳар ҳокимлигида Сингапурнинг Alpha Global Capital компанияси мутасаддилари билан учрашув бўлиб ўтди. Унда чиқиндиларни қайта ишлаш йўналишидаги ишларни янги босқичга олиб чиқиш масаласи муҳокама қилинган, дея хабар бермоқда пойтахт ҳокимлиги матбуот хизмати.

Таъкидланишича, Сингапур компанияси бугунги кунда қаттиқ ва аралаш турдаги чиқиндиларни қайта ишлаш натижасида экологик тоза ўғитлар ишлаб чиқариш, қурилиш материаллари тайёрлаш, шунингдек, сувни зарарсизлантириш учун қатор технологияларни ишлаб чиққан.

Пойтахт ҳокимлигидан қайд этилишича, Alpha Global Capital таклиф этаётган технологиялар кичик ҳудудларга мўлжалланган бўлиб, транспорт харажатини талаб этмайди, атроф-муҳитга зарарли моддаларни чиқармайди, шунингдек, энергия тежамкордир.

“Сувни зарарсизлантириш бўйича таклифлари каналларнинг санитар ҳолатини яхшилаш ва ободонлаштириш учун фойдали”, — дейилади Тошкент шаҳар ҳокимлиги ахборотида.