18 феврал, сешанба куни Сингапур мамлакат иқтисодиётига зарарли таъсир кўрсатган коронавирус хавфи билан курашиш учун 4,6 миллиард АҚШ доллари ҳажмидаги молиявий пакетни тақдим этди.

Бутунжаҳон молия марказларидан бири бўлган давлатда коронавирус билан боғлиқ 77 та ҳолат қайд этилган. Бу Хитойнинг қуруқлик қисми (72 439), Diamond Princes кемасидан (454) кейинги энг кўп коронавирус ҳолати қайд этилган нуқта бўлди.

Хитой билан яқин алоқада бўлган очиқ иқтисодиётли Сингапурда коронавирус ҳам туризм ҳам савдога жиддий хавф солмоқда.

Сингапур молия вазири Ҳенг Су Кит коронавирусга қарши кураш учун мамлакат бюджетидан 6,4 млрд Сингапур доллари (4,6 млрд АҚШ доллари) миқдорида молиявий пакет ажратилишини маълум қилди. Вазир, шунингдек, ушбу маблағ вирус тарқалишининг олдини олишига умид қилишини қўшимча қилди.

“Вирус тарқалишининг давомийлиги ва жиддийлиги ҳамда унинг глобал иқтисодиётга таъсири ҳалигача номаълум”, — деди у.

Ушбу маблағ вирусдан энг кўп зарар кўрадиган ширкатлар ва оилалар, жумладан авиация, туризм, чакана савдодаги фирмаларга ёрдам пули сифатида берилади.

Шунингдек, вирусдан зарар кўрган оилаларга озиқ-овқат ваучерлари ва бир қисми пул сифатида ёрдам пуллари берилади.

800 миллион Сингапур доллари миқдоридаги пул тўғридан тўғри вирусга қарши кураш учун ажратилган.