1 июн куни Сирдарё вилоятининг Сайхунобод туманида IT-марказ очилди, деб хабар беради ИТ Парк матбуот хизмати. Рақамли технологиялар ўқитиладиган марказ тумандаги гавжум кўчалардан бири Алишер Навоий кўчасида, "Ўзбектелеком" АК биносида жойлашган.
132 м² янги филиалда дастурлаш, робототехника, киберспорт бўйича дарс бериш учун барча шароитлар мавжуд.
Марказда қуйидаги фанлар ўқитилади:
- компютер саводхонлиги;
- MS Office билан чуқур ишлаш;
- веб дастурлаш тиллари;
- графика ва дизайн асослари;
- мобил иловаларни яратиш;
- Python дастурлаш тили;
- Arduino ва Lego Mindstorms асосида мобил робототехника;
- киберспорт ўйинлари.
Курслар учта ёш тоифасида болалар ва ёшларни тайёрлашга қаратилган: 9 ёшдан 15 ёшгача, 16 дан 19 ёшгача ва 20 дан 25 ёшгача.
Бундан ташқари, ушбу IT-марказда, бошқа тармоқларда бўлгани каби, карантиндан кейин тадбирлар, онлайн веб-семинарлар, семинарлар, э-спорт ва робототехника бўйича мусобақалар ўтказилади.
Июн ойида Сирдарё вилоятининг Гулистон, Ховос ва Янгиер шаҳарларида IT-марказининг филиалларини очиш режалаштирилган. Умуман, 2020 йил охирига қадар Сирдарё вилоятида саккизта IT-марказлар очилади. IT-марказларининг харитасини бу ерда кўришингиз мумкин.