Ўзбекистоннинг Қирғизистондаги анклави Сўх туманидаги Чашма булоғи воқеаларида талафот кўрган хонадонлар тиклаб берилди. Бу ҳақда ДХХ чегара қўшинлари ахборот хизмати хабар берди.
Маълумки, жорий йилнинг 31 май куни Фарғона вилояти Сўх туманидаги Чашма булоғи ёнидан ўтган Қирғизистон билан чегара ҳудудида низо келиб чиққанди. Ушбу нохуш воқеаларда Чашма маҳалласида яшовчи фуқаролар Раҳматжон Тўхтасинов ва Равшанжон Тўхтаназаровларнинг хонадонлари катта талафот кўргани боис, ҳукуматимиз томонидан бу хонадонларни тиклаш бўйича топшириқлар берилган эди.
Абдулла Арипов Сўхдаги можаро юзасидан Қирғизистон ҳукумати вакили билан учрашади
Шунга кўра, Р.Тўхтасиновнинг хонадони капитал таъмирланган бўлса, фуқаро Р.Тўхтаназаровга янги уй қуриб берилди. Қурилиш-таъмирлаш ишларига давлатимиз томонидан 600 миллион сўм маблағ йўналтирилди.
Куни кеча ушбу хонадонларнинг фойдаланишга топшириш тадбири ўтказилди. Унда маҳалла фаоллари билан бирга ДХХ Чегара қўшинлари ҳарбий хизматчилари ҳам иштирок этди.