Сурхондарёда кузатилган сел туфайли 1000 га яқин фуқаро эвакуация қилинди

Сурхондарёда кузатилган сел туфайли 1000 га яқин фуқаро эвакуация қилинди

Фото: ФВВ

2020 йил 13 май куни соат 21:00 да кучли ёмғир ёғиши натижасида Сурхондарё вилоятининг Олтинсой тумани ҳудудидан оқиб ўтувчи “Олтинсой” сойининг сув ҳажми сезиларли даражада ошган. Бу ҳақда ФВВ матбуот хизмати хабар берди.

Мазкур ҳолат натижасида сув тошқини юзага келиши мумкинлиги сабабли вилоят Фавқулодда вазиятлар бошқармаси ҳамда Фавқулодда вазиятларда уларнинг олдини олиш ва ҳаракат қилиш давлат тизими (ФВДТ) куч ва воситалари ёрдамида ушбу ҳудудда истиқомат қилаётган 900 нафар фуқаро хавфсиз (яқин қариндошлари уйлари) ҳудудга вақтинча кўчирилди.

Фото: ФВВ

Бундан ташқари, шу куни Бойсун туманидаги “Пасурхи” маҳалласига Бойсун тоғ тизмасига сурункали ёмғир ёғиши натижасида “Ойбарак” сойи орқали сел келган.

Шунингдек, туманнинг “Ҳунармандлар” маҳалласидан оқиб ўтувчи “Авлод” сойи орқали сел келиши оқибатида “Авлод” ҳамда “Сариосиё” қишлоқларини боғлаб турувчи кўприкни сув босганлиги туфайли автомобилларнинг ҳаракатланиши вақтинча тўхтатилган.

Вазият вилоят Фавқулодда вазиятлар бошқармаси томонидан тўлиқ назоратга олинган. Айни дамда бошқарма қутқарувчилари ҳамда ФВДТнинг 150 дан ортиқ ходими, шунингдек, 20 га яқин техника ёрдамида сел оқибатларини бартараф этиш ишлари олиб борилмоқда.

Фото: ФВВ

Сел оқибатида жабрланган ва ҳалок бўлганлар тўғрисида маълумот келиб тушмаган.