Вучжен, Хитой
Хитойнинг Янцзи дарёси бўйлаб бир қанча шаҳарлар қад кўтарган бўлиб, уларнинг орасида Вучжен ўзига хослиги билан ажралиб туради. Олимларнинг айтишича, одамлар бу ерда 7000 йил муқаддам яшай бошлаган. Айнан Вучжен Хитойнинг сувдаги шаҳарлари орасида тарихий қиёфасини яхши сақлаб қолган ва бу билан сайёҳлар эътиборини ўзига тортади. Шаҳарнинг катта қисми ёғоч бинолардан иборат. Маҳаллий аҳоли минг йиллардан бери турмуш тарзини ўзгартиргани йўқ: керакли озиқ-овқат маҳсулотларини уйларини тарк этамасдан харид қилишади. Бунинг учун деразалари тагидан сузиб ўтаётган савдо қайиқларидан бирини тўхтаталар кифоя.
Чжоучжуан, Хитой
Чжоучжуан – Тайху кўли ҳавзасида жойлашган қадимий шаҳар, анҳорлар унинг кўчаларини ташкил этади. Кўл эса – шаҳарнинг марказий майдони. Чжоучжуанда диққатга сазовор жойлар кўп бўлса-да, хорижий саёҳларни деярли учратмаймиз, аммо шаҳар маҳаллий, яъни хитойлик сайёҳлар орасида жуда машҳур. XI асрда барпо этилган Ченгксу ибодатхонаси шаҳарнинг энг ёрқин қадимий обидаларидан бири ҳисобланади. Ибодатхонага олиб борадиган узун тош кўприк остида тилла балиқлар ғиж-ғиж. Шунингдек, шаҳар ўн тўртта қадимий кўприклари билан ҳам машҳур, уларнинг энг эскиси 1355 йилда қурилган.
Удайпур, Ҳиндистон
Ҳиндистонлик келин-куёвлар асал ойини учта кўл орасида жойлашган Удайпурда ўтказишни яхши кўришади. Шаҳарнинг маҳобатли қалъалари ва саройларни кишини ўзига мафтун этмай қўймайди. Айниқса, Пичола кўли ўртасида XVIII асрда қурилган Кўл саройи нафақат Ҳиндистонда, балки бутун дунёда машҳур. Оқ мармар билан қопланган ушбу сарой бир пайтлар ҳинд ҳукмдорларининг ёзги қароргоҳи вазифасини ўтаган, ҳозир эса бу ерда меҳмонхона хизмат кўрсатмоқда. Қарийб ярим миллион аҳолига эга Удайпур шаҳри Фотиҳ кўли атрофидаги гўзал боғлари билан ҳам ном чиқарган.
Брюгге, Бельгия
Брюгге – Бельгиянинг Ғарбий Фландрия вилояти маркази. Бу ердаги тарихий бинолар Венециядаги каби яхши сақланиб қолган. Шаҳар бўйлаб учта йирик канал – Гент, Слёйс ва Остенд оқиб ўтади. Уларнинг чуқурлиги ҳатто денгиз кемаларининг сузиб ўтишига ҳам имкон беради. Шаҳарнинг марказий қисмида кўчаларни ташкил этувчи кичик каналлар бўйлаб эса қайиқларда ҳаракатланишга тўғри келади. Шаҳарда жами эллик тўртта кўприк бор, улардан иккитаси катта кемаларнинг ўтиши учун очилиб-ёпилади.
XIV асрда Брюгге Шимолий Европанинг муҳим савдо марказларидан бири эди. Илк биржа 1406 йилда айнан шу шаҳарда очилган.
Мескальтитан, Мексика
Мексиканинг ҳам ўз Венецияси бор – Наярит штатидаги кўлда жойлашган Мескальтитан шаҳарчаси. Афсоналарга кўра, бу ерда бир пайтлар ацтек ҳиндулари цивилизациясига бешиклик қилган Ацтлан шаҳри жойлашган бўлган. Ацтеклар 1091 йилда жануб томонга йўл олишган ва Теночтитлан (ҳозирги Мехико) шаҳрига асос солишган эмиш.