Баъзи урушлар атиги бир неча дақиқа, баъзилари эса ўн йиллаб давом этган. Қуйида давомийлиги бўйича ўзига хос «рекорд» ўрнатган урушлар билан танишасиз.
Вьетнам уруши
АҚШ ва Вьетнам ўртасидаги уруш 14 йил – 1961 дан 1975 йилгача давом этган. Бу уруш Қўшма Штатлар тарихидаги энг қора нуқталардан бири, Вьетнамда эса фожиали давр саналади. Бир томон Вьетнамнинг мустақиллиги учун, иккинчи томон ушбу мамлакататни бирлаштириш учун курашган. Википедияда қайд этилишича, мазкур урушда АҚШ 6 727 084 тонна бомба ишлатган (қиёс учун: Иккинчи жаҳон урушида Германияга 2 700 000 тонна бомба ташланган).
Уруш оқибатида 58 минг америкалик ҳалок бўлди, 303 минг нафари яраланди. Жанубий Вьетнамда ҳалок бўлганлар сони тахминан 250 минг, яралаланганлар сони 1 миллион атрофида. 1995 йили Вьетнам ҳукумати бу урушда 1,1 миллион Шимолий Вьетнам ҳарбийлари ҳалок бўлганини маълум қилди, мамлакатнинг ҳар икки қисмида 2 миллион тинч аҳолининг қони тўкилган.
Буюк шимол уруши
Шимол мамлакатлари (Россия, Дания-Норвегия, Саксония, Пруссия) ва Швеция ўртасида келиб чиққан уруш 21 йилга (1700-1721) чўзилган. Сабаб – Болтиқбўйи ерларига даъвогарлик. Уруш Швециянинг мағлубияти билан тугаган.
Ўттиз йиллик уруш
Бу уруш 1618-1648 йиллар оралиғида бўлиб ўтган. Германияда католиклар ва протестантлар ўртасида келиб чиққан қуролли низо қарийб бутун Европага ёйилиб кетган. Тарихчиларнинг айтишича, ўттиз йиллик уруш давомида 700 мингга яқин киши ҳалок бўлган.
Алвон ва оқ атиргуллар уруши
Англиянинг икки зодагонлар сулоласи – Ланкастер-Плангетлар ва Йорклар ўртасида келиб чиққан уруш 1455 йилдан 1487 йилгача давом этди. Қон тўкилишининг сабаби жуда оддий – ҳокимият талашиш. Ланкастер-Плангетлар тимсол сифатида қизил атиргул, Йорклар эса оқ атиргул тасвиридан фойдалангани учун улар ўртасидаги жангу жадал атиргуллар уруши номини олган. Турган гапки, уруш турли вайронагарчиликлар ва қурбонларсиз кечмади. Ниҳоят, Ланкастерлардан бўлган Генрих Тюдор ғалабага эришди, унинг авлодлари Англия ва Уэльсда 117 йил ҳукмронлик қилишди.
Пун уруши
Рим ва Карфаген ўртасида уч бочқичда – жами 43 йил давом этди. Ўрда ер денгизи ҳудудида ҳукмронлик учун келиб чиққан кураш римликларнинг ғалабаси билан якунланди.
Учинчи Пун уруши милоддан аввалги 149-146 йилларда бўлиб ўтган. Қизиғи шундаки, 1985 йилнинг 5 февралида Рим мэри Уго Ветеренинг Тунисга ташрифи чоғида Рим ва Карфаген ўртасида тинчлик сулҳи тузилган. Шундай қилиб, Учинчи Пун уруши расман 2133 йил давом этган.
Юнон-форс уруши
Юнонлар ва аҳамонийлар салтанати ўртасида келиб чиққан уруш танаффуслар билан эллик йил – 499-449 йиллар ўртасида давом этди. Ўз мустақиллиги учун курашган юнонлар пировардида ғалабага эришди.
Бу уруш ҳақидаги маълумотлар фақатгина юнон манбалари орқали етиб келган
Юз йиллик уруш
Тарихга «юз йиллик уруш» номи билан кирган бу қуролли низо 116 йил – 1337 йилдан 1453 йилгача Англия ва Франция ўртачида кечган. Албатта, уруш мунтазам давом этмаган, орада танаффуслар бўлган. Инглизларнинг ўз ҳукмронлигини кенгайтиришга бўлган уриниши мағлубият билан якунланган.
