Tesla компанияси Шанхайдаги экспортга мўлжалланган заводида электромобиллар ишлаб чиқаришни тўхтатди, деб хабар бермоқда Reuters. 

Маълумотларга кўра, автомобиль ишлаб чиқарувчиси эрталабки сменани бекор қилиб, ишчиларга дам олишга имкон берган. Тўхтатиб туриш сабаби маълум эмас. 

Хитойда ишлаб чиқаришнинг музлатилиши коронавирус билан касалланиш ҳолатлари кўпайиши фонида содир бўлмоқда. 

Агентлик манбаларидан бири Tesla'нинг кўплаб ходимлари ва етказиб берувчиларининг касаллиги компания учун жиддий муаммога айланганини таъкидлади. 

Эслатиб ўтамиз, таҳлилчилар Tesla бўйича ўз прогнозларини Илон Маскнинг Twitter ривожига қаратгани сабабли ёмонлашган эди.

Электр автомобиль ишлаб чиқарувчиси 2021 йил ноябридаги барча вақтлардаги энг юқори кўрсаткичдан 70 фоизга яқин қийматини йўқотди. Вазиятни эса истеъмолчиларнинг бошқа электр транспорт воситаларини, жумладан Ford Motor, Rivian Automotive, BYD'ни танлаши тобора кўпроқ эканлиги билан мураккаблаштирмоқда.