Global Finance журнали технологик энг ривожланаётган мамлакатлар рейтингини эълон қилди. Унга 67 мамлакат киритилган.

Мамлакатимиз ушбу рўйхатга киритилмаган. Лекин қўшнимиз Қозоғистон киритилган. Қозоқлар 36-ўринга “муносиб кўрилган”. Ундан кейинги ўринларда Италия ва Хитой жой олган.

МДҲ мамлакатлари

Собиқ совет мамлакатларидан энг яхши натижани Эстония қайд этган — 20-ўрин. Ундан кейин Литва (27), Латвия (30), Қозоғистон (36), Украина (44), Россия (46). Қолганлар эса ушбу рўйхатга киритилмаган.

Энг яхши ўнта мамлакат

Рўйхатнинг дастлабки ўнта мамлакатлари рўйхатига Скандинавия мамлакатлари — Норвегия (1), Швеция (2), Дания (4), Финландия (7); Нидерландия (3), АҚШ (5), Осиё-Тинч океани минтақаси мамлакатлари — Сингапур (6), Корея Республикаси (9), Гонконг (10) ҳамда БАА (8) киритилган.

Натижа учта мезон асосида ҳисоблаб чиқилган: бу Интернетдан фойдаланиш (компаниялар ва мамлакатлар фуқаролари томонидан), рақамли иқтисодиёт учун инфратузилма (онлайн савдо, электрон ҳукумат, кибер-хавфсизлик даражаси) ва инновацияларга очиқлик (хусусан, мамлакатда олиб борилаётган тадқиқотлар фаолияти ва унинг дунёнинг қолган қисмидаги дастурчилар билан ўзаро алоқалари).