Америкалик Уильям Кейлин ва Грегг Семенза, британиялик Питер Рэдклифф физиология ва тиббиёт бўйича 2019 йилги Нобел мукофоти совриндорларига айланди.
DW хабарида айтилишича, улар ҳужайраларнинг кислороднинг мавжудлигига реакцияси ва унга мослашишини ўргангани учун мукофотга лойиқ кўрилган.
“Олимлар турли даражадаги килородга жавобан генларнинг фаоллигини тартибга солувчи молекуляр механизмни аниқлашди”, – дейилади Нобел қўмитасининг баёнотида.
Нобел мукофотининг миқдори 9 миллион швед кронасига (қарийб 830 минг еврога) тенг бўлиб, турли йўналишлардаги мукофотлар 10 декабрь – Альфред Нобел вафот этган кунда топширилади.