Қулайликлардан яна ўйингоҳдан иборат она ва бола хонаси, ювиниш хонаси, тиббиёт пунктини санаб ўтиш мумкин, деб ёзмоқда Sputnik Ўзбекистон сайти.

“Тошкент” халқаро аэропортида амалга оширилган таъмирлаш ишларидан сўнг “Ўзбекистон ҳаво йўллари” МАК ва бошқа авиакомпанияларнинг бизнес-классда учувчи йўловчилар учун мўлжалланган янги Business Lounge “Uzbekistan airways” кутиш зали ишга туширилди.

Янги Business Lounge “Uzbekistan airways” лойиҳаси архитектуранинг энг сўнгги ютуқларини ўзида мужассам этган. Кўркам кутиш зали 160 ўринга мўлжалланган. Энг муҳими, йўловчилар учун турли қулайликлар яратилган: ўйингоҳдан иборат она ва бола хонаси, ювиниш хонаси, тиббиёт пункти ва божсиз савдони амалга оширувчи дўконни бунга мисол келтириш мумкин.

Турли таомлар ва ичимликларни таклиф этувчи шинамгина кафе-бар ҳам йўловчилар хизматида.

Бундан ташқари, ўз учиш соатларини кутаётган йўловчилар юмшоқ мебелларда катта ҳажмли телеэкранлардан, бепул Wi-Fi хизматидан ва мунтазам равишда янгиланиб туриладиган матбуот нашрларидан фойдаланишлари мумкин.

Янги Business Lounge “Uzbekistan airways”да имконияти чекланган йўловчилар учун алоҳида шароитлар яратилди. Бу ислоҳотлар Ўзбекистонга ташриф буюрадиган сайёҳлар сонининг ошишига хизмат қилиши кутилмоқда.