Нархлар ошиши энг кўп Мирзо-Улуғбек, Яккасарой ва Яшнобод туманларида кузатилган.
2022 йилнинг 6 ойида Ўзбекистонда кўчмас мулк бозорида савдо ҳажми 6%га ўсди. Бу ҳақда Иқтисодий тадқиқотлар ва ислоҳотлар маркази таҳлилларида келтирилган.
Унга кўра, мазкур даврда 126 минг дона кўчмас мулк олди-сотди шартномалари расмийлаштирилган бўлиб, бу кўрсаткич 2021 йилнинг мос даврига нисбатан 6%га кўп.
Ҳудудлар кесимида энг юқори ўсиш суръатлари Хоразм (24%), Бухоро (22%), Сурхондарё (16%), Жиззах (13%), Наманган (13%), Қашқадарё (12%) ва Фарғона (11%) вилоятларида кузатилди.
Кўчмас мулк олди-сотдисининг 28%и ипотека кредитлари орқали расмийлаштирилган.
Иккиламчи уй-жой бозорида нархлардаги энг катта ўсиш Тошкентда кузатилди. Йил бошидан буён пойтахтда нархлар 11,3%га ошди.
Бу кўрсаткич барча туманларда қайд этилиб, энг катта ўсиш Мирзо-Улуғбек (18,7%), Яккасарой (16%) ва Яшнобод (14,3%)да кузатилди.