Украина Президенти Владимир Зеленский БМТ Бош Ассамблеяси минбарида қилган чиқишида “Учинчи жаҳон уруши эҳтимоли борлиги ва бу уруш дунёнинг интиҳоси бўлиши” ҳақидаги гаплар ўша урушнинг эълони эмас, ҳозирги глобал зиддиятларнинг натижасидан тўғри хулоса қилиш эканлигига умид билдирди.

Украин етакчиси чоршанба куни, Ню-Йоркда, БМТ Бош Ассамблеяси 74-сессиясининг умумий муҳокамалари пайтида шундай баёнот берди.

Шунингдек, Зеленский дунё аҳлини “уруш сабабли руҳи мажруҳ бўлган ҳар бир авлод янги, ҳеч қачон ютиб бўлмайган урушга йўл очиши” ҳақида эслашга чақирган.

Украина президенти аввалроқ БМТдаги чиқишида “Бирлашган Миллатлар Ташкилотида мамлакатлар камбағаллик, ҳалокатлар ва урушларнигина бирлаштираётгани”ни айтган, шу сабабли БМТ фойдасиз тузилмага айлангани, уни янгилаш лозимлигига урғу берган эди.

Шу кунларда Россия Мудофаа вазири Сергей Шойгу “Московский комсомолец” нашрига берган интервюсида кенг миқёсли уруш юз бермаслигига умид билдириб, “Урушни келтириб чиқарадиган барча хавфлар ва унинг эҳтимолий натижалари қандай бўлиши ҳаммага маълум”, деб айтди.

Вазир: “Учинчи жаҳон урушининг сабаблари қандай бўлиши ҳақида кўплаб, ҳар хил тахминлар бор. Менимча, буларнинг ичида энг аниқ ва тўғриси шундай “Учинчи жаҳон уруши қандай бўлишини билмайман. Аммо аниқ биламанки, у сўнгги уруш бўлади”, деб қўшимча қилди.