Кеча, 9 декабрь куни Ўзбекистон ҳаво йўлларининг HY0095 авиарейси эрталаб 8 дан бери йўловчилари билан ушлаб тургани ҳақида хабар берган эдик.
Шунингдек, борт кузатувчилари самолёт бортини тарк этганларга авиачипта қиймати қопланмаслигини айтишиб, норозилик билдирганлар вазиятга изоҳ сўраганлари ва жараённи видеога олганларга милиция наряди чақирилгани ва норози аёллар ҳуқуқларини талаб этгани учун алоҳида аёл милиция ходими ҳам етиб келгани маълум қилинган.
Шундан сўнг, Ўзбекистон ҳаво йўллари ушбу масалага расмий муносабат билдирди.
Аввалроқ, “Наманган” ва “Фарғона” халқаро аэропортлари қуюқ туман туфайли ҳаво кемаларини қабул қилиш учун ёпилган эди. Шу сабабли “Uzbekistan Airways” компаниясининг HY-620 Москва-Наманган йўналиши бўйича 8 декабрда парвоз қилган Boing 757 ҳаво кемаси командири қарори билан “Тошкент” аэропортига соат 17:41 қўнди.
“Наманган” аэропортида об-ҳаво узоқ муддат яхшиланмаганлиги боис, ер усти транспорти билан манзилга етиб олишни истаган йўловчиларга, авиакомпания қоидаларига мувофиқ, Наманганга етиб олиш учун йўл харажатларини қоплаш учун компенсация тўлаб берилди. Йўловчиларга, жумладан юки кўп бўлганларга, авиакомпания томонидан якуний манзилга энг яқин қатнов билан етиб олиш таклифи берилди.
Авиакомпания хабарига кўра, кечаги воқеалар, айнан шу рейсда содир бўлган. Москвадан учиб келаётган 37 нафар йўловчи 9 декабрь куни соат 08:25даги HY-095 қатнов билан Наманганга етиб боришга розилик билдирган.
Лекин, “Наманган” аэропортида узоқ вақт об-ҳаво ўзгармаганлиги сабабли HY-095 қатнов вақти соат 10:00га, сўнгра 12:00 ва 14:00га кўчирилди. Учишни кутиш вақтида йўловчилар “Тошкент” аэропорти халқаро йўналишлар терминалининг кутиш залига жойлаштирилди, у ерда уларга икки марта иссиқ овқат - кечки овқат/эрталабки нонушта тақдим этилди, дейилади компания хабарида.
9 декабрь куни соат 07:00да йўловчилар Наманганга учиш учун ер-усти транспорти билан маҳаллий авиайўналишлар аэровокзалига етказилди. “Наманган” аэропортида об-ҳаво яна ёмонлашгани йўловчиларнинг самолётда узоқ вақт кутишига сабаб бўлди. Баъзи агрессив кайфиятдаги йўловчилар ҳолатни тушунмасдан, об-ҳавога қарамасдан, тезроқ Наманганга учишни талаб қилдилар. “Наманган” аэропорти очилиши тўғрисида маълумот олиниши билан, ҳаво кемаси командири учишга қарор қилди ва йўловчилар самолётга таклиф қилинди. Ўша агрессив кайфиятдаги йўловчилардан бири самолёт саҳнига чиққач, ўз эътирозлари билан катта борт кузатувчига ташланди. 5 нафар йўловчи, шу жумладан катта борт кузатувчига тан жароҳати етказган йўловчи аёл аэропорт милиция линиявий бўлими вакиллари томонидан қатновдан четлаштирилди, бу ҳолат экипаж аъзосини алмаштиришни талаб этди. Таъкидлаш жоизки, ушбу вақт давомида “Uzbekistan Airways” раҳбарияти ва масъул ходимлари аэропортда бўлиб, тушунтириш ишлари олиб бордилар ва йўловчилар билан тўғридан-тўғри мулоқотда бўлдилар, йўловчиларга хизмат кўрсатиш учун барча чораларни кўрдилар.
Шунингдек, “Uzbekistan Airways” йўловчилардан учиш ва қўниш аэропортларида қишки мавсумдаги ёмон об-ҳаво шароити туфайли парвозлар жадвалига киритилаётган ўзгаришларга тушунган ҳолда ёндашишни сўрайди, чунки парвозлар ва йўловчилар хавфсизлиги бизнинг энг муҳим вазифаларимиздан ҳисобланади.