Валюта курси: Ўз.Р.Марказий банки
USD
АҚШ доллари
EUR
Eвро
RUB
Россия рубли
Sayt test rejimida ishlayapti!!!

Сўнгги янгиликлар






«Вазият шундай давом этса, ҳокимларни ўзим ишдан оламан». Президент айрим вилоят ҳокимларини танқид қилди
22.04.2021 19:34,  
4087

Шавкат Мирзиёев 22 апрель куни ўтказилаётган видеоселектор йиғилишида хизмат кўрсатиш соҳалари ривожланмагани учун вилоят ҳокимларини танқид қилди. Бу ҳақда «Kun.uz» хабар берди.

Хабарга кўра, Президент мазкур селекторда ҳудудларда хизмат кўрсатиш соҳасини ривожлантириш бўйича 2021 йилда амалга ошириладиган вазифалар белгилаб олинишини айтиб ўтган.

«Бу соҳага 500 миллион доллар пул ажратяпмиз. Қийин пайт бўлишига қарамай, шундай қиляпмиз. Энди бу маблағдан самарали фойдаланиш зарур. Ҳар бир раҳбардан шуни талаб қиламиз. Бугунги селекторда ҳудудларда хизмат кўрсатиш соҳасини ривожлантириш бўйича жорий йилда амалга ошириладиган устувор вазифаларни белгилаб оламиз. Пандемиянинг салбий таъсири кўпроқ хизматлар ва сервисга тўғри келгани боис ушбу соҳадаги тадбиркорларни қўллаб-қувватлаш учун 24 та турдаги солиқ имтиёзлари, субсидия ва бошқа преференциялар тақдим этиш орқали 35 триллион сўмлик кўмак берилди. Тарихимизда бунақа маблағ ажратилмаган», — дейди давлат раҳбари.

Қайд этилишича, берилган енгилликлар ҳам тадбиркорлар, ҳам банклар учун катта имконият бўлган. Масалан, 2020 йилда тадбиркорликни ривожлантириш дастурлари доирасида хизмат соҳасига 1 триллион сўм имтиёзли кредит ресурслари ажратилган. Бундан ташқари, тижорат банклари ўз маблағлари ҳисобидан соҳага қўшимча яна 14 триллион сўм кредитлар ажратгани ҳам аҳолининг хизматлар бозорига қизиқиши юқорилиги, ҳали бу соҳада имкониятлар кўплигидан далолат беради. Кенг имтиёзлар берилгани натижасида сервис соҳаларида ўзини ўзи банд қилган 500 минг нафар фуқаро расмий рўйхатдан ўтди. Бундай рақам ҳам Ўзбекистон тарихида қайд этилмаган.

«Қайси ҳудуд, шаҳар ва туманлар ушбу имкониятлардан самарали фойдаланган бўлса, ўз натижасини берди. Жумладан, Қўқон ва Ширин шаҳарлари, Кармана туманида аҳоли жон бошига умумий хизматлар ҳажми 6,5 миллион сўмни ташкил этиб, республика кўрсаткичидан юқори бўлди (6,4 миллион сўм). Лекин, 26та ҳудуд, хусусан, Беруний, Шуманай, Чироқчи, Қамаши, Гулистон, Ховос, Олтинсой, Қумқўрғон, Ўзбекистон, Ёзёвон туманларида бу кўрсаткич анча паст (2 миллион сўмдан кам).

Транспорт хизматлари аҳоли жон бошига Қўнғирот ва Қоровулбозорда – 4 миллион сўмдан, Чирчиқ ва Урганч шаҳарларида – 3 миллион сўмдан тўғри келиб, энг яхши кўрсаткич сифатида қайд этилган (республика бўйича ўртача 1,6 миллион сўм). Лекин Тахиатош, Элликқалъа, Арнасой, Зафаробод, Фориш туманларида транспорт хизматлари аҳоли жон бошига атиги 300 минг сўмни ташкил қилган. Бу дегани ўша ерларда транспорт хизмати йўқ дегани, вазир бунга жавоб бериши керак.

Чакана савдо хизматлари Булоқбоши, Қибрай, Ўрта Чирчиқ, Янгийўл, Олот, Ғиждувон, Когон, Миришкор, Нишон, Конимех, Учқудуқ ва Кармана туманларида нисбатан яхши ривожланмоқда. Бироқ, Қонликўл, Тахиатош, Оқолтин, Ховос, Оҳангарон, Пскент туманларида ушбу хизматлар республика ўртача кўрсаткичидан 3 баробар паст. Мана шу туманлар ҳокимлари ҳам ойлик олади, селекторда шуларга ҳам топшириқ берилади. ‘Темир дафтар’ларини кўрсангиз тўла.

Овқатланиш хизматлари жон бошига Қоровулбозор (745 минг сўм), Қўнғирот (455 минг сўм) ва Кармана (270 минг сўм) туманларида юқори кўрсаткичларни қайд этди. Лекин бу кўрсаткич Бахмал ва Ховосда – 11 минг сўм, Избоскан, Пахтаобод, Янгиариқ, Қўшкўпир, Бўстон туманлари ва Нурафшон шаҳрида – 15 минг сўмдан, Балиқчи ва Янгиқўрғонда – 17 минг сўмни ташкил этади. Бекобод, Боёвут, Ҳазорасп, Сергели, Оққўрғон туманларида давлат таълим муассасаларида, Паркент, Сирдарё ва Тупроққалъа туманларида тиббиёт муассасаларида тижорат хизматларини кўрсатиш даражаси ўта паст. Энг ачинарлиси, жойларда аниқ методология яратилмагани, шунингдек, сектор раҳбарлари эътиборсизлиги оқибатида кўрсатилаётган хизматлар ҳажми, объектлар сонини аниқлаш ва ҳудудлар салоҳиятини тўғри баҳолашнинг бугун ҳам имкони йўқ. Ҳар бир вилоят ҳокими соҳадаги аҳвол ва мутасадди раҳбарларнинг масъулиятини кеча ўз ҳудудидаги селектор йиғилишларида танқидий муҳокама қилди. 27 нафар раҳбар лавозимидан олинди, 54 нафарига интизомий жазо берилди. Шундаям вилоят ҳокимлари вазиятни силлиққина ўтказяпти, вазият шундай давом этса, ҳокимларни ўзим ишдан оламан», — деди Шавкат Мирзиёев.

Тавсия этамиз






Тавсия этамиз

Ҳар доим хабардор бўлинг!

carzone.uz мобил иловаларини кўчириб олинг ва барча янгиликлар сиз билан