“Persil”, “Losk” ва “Vernel” ювиш воситаларини ишлаб чиқарувчи Германиянинг “Henkel” кимё-саноат концерни Россия бозоридан бутунлай чиқиб кетиш муддатини эълон қилди. Бу ҳақда бош директор Карстен Кнобел WirtschaftsWoche нашрига берган интервьюсида гапирди.
Унинг сўзларига кўра, улар жорий йилнинг биринчи чорагида бизнесни сотишни якунламоқчи, ҳозирда сўнгги музокаралар олиб борилмоқда. Шу билан бирга, Кнобел бу мураккаб жараён эканлигини таъкидлади. "Шартнома бир нечта харидор ва бир сотувчи томонидан имзоланади", деб тушунтирди у ва Россия ҳукумати томонидан бажарилиши керак бўлган жуда кўп талаблар мавжудлигини қўшимча қилди.
Россия бозори компания учун жуда муҳим эди. 2021 йилда мамлакатдаги сотувлар тахминан 1 миллиард еврони ташкил этди, бу Henkel умумий ҳажмининг деярли 5 фоизига тўғри келади. Кнобелнинг сўзларига кўра, харидор россиялик инвесторлар консорциуми бўлиши мумкин.
2022 йил охирида Henkel акциядорлари қўмитаси ва кузатув кенгаши раиси Саймон Бажел-Тра компания Россия бизнесини сотиш жараёнини тезлаштиришга умид қилишини айтди. "Коммерсант" газетасининг ёзишича, Henkel Россиядаги бизнесини ажратиб, Россия бозорида бошқа ном – Lab Industries номи остида мустақил компания сифатида фаолият юритади.
Henkel 2022 йил баҳорида Россиядаги ишини тўхтатишини эълон қилди. Компания Adhesive Technologies (елимлар ва технологиялар), Laundry & Home Care (тозалаш воситалари ва ювиш воситалари) ва Beauty Care (косметика) ни бирлаштиради. Бренд портфелига Persil, Bref, Pril, Laska, Schwarzkopf, Syoss, Fa, Ceresit, Moment adhesives, Loctite ва бошқалар киради.
Компания Россияда 1991 йилдан бери ишлайди. Айни пайтда ишлаб чиқарувчи мамлакатнинг турли ҳудудларида 12 та офис ва 11 заводга эга.