AliExpress'нинг бош компанияси Хитой онлайн-гиганти Alibaba Group 9 январь, душанба кунги савдоларда 8,66 фоизга ошиб, 110,4 HK долларни (Гонконг доллари) ташкил этди. Буни Гонконг фонд биржаси маълумотлари тасдиқлайди. Энг юқори чўққисида акция нархи 110,9 Гонконг долларига етди.
Alibaba қимматли қоғозлари Хитой Халқ банки (PBOC) губернаторининг ўринбосари ва PBOC'да ташкил этилган Коммунистик партия қўмитаси котиби Го Шуцининг расмийлар мамлакат технологик компанияларига нисбатан қаттиқ сиёсатни босқичма-босқич бекор қилаётганини айтганидан кейин кўтарилди, деб хабар беради Bloomberg.
Мулозимнинг айтишича, 14 та интернет-компаниялар, жумладан, Ant Group молиявий фаолиятини тўғрилаш бўйича махсус кампания асосан якунланди, ҳал қилиниши керак бўлган бир нечта масалалар қолди.
Агентликнинг таъкидлашича, бу ҳаракат Хитойда хусусий тадбиркорликнинг асосий омили бўлган технология секторига босимнинг тўхтатилишидан далолат беради. Бу ҳукумат 2022 йил охирида иқтисодиётнинг секинлашиши ва блокировкалар туфайли фуқароларнинг норозиликлари фонида COVID-19 учун "ноль бардошлик" сиёсатидан воз кечганидан кейин қабул қилинди.
Бундай шароитда Goldman Sachs таҳлилчилари Alibaba акцияларини фаворитлар рўйхатига қўшиб, "улар учун энг ёмони тугади" деб ҳисоблашди. Jefferies Financial Group шунингдек, Гонконг ва АҚШдаги Alibaba акциялари бўйича ўз бенчмаркини кўтариб, компания Хитой иқтисодиёти тикланар экан, сифатли хизмат кўрсатиш ва рақобатбардош маҳсулот ва хизматлар нархлари орқали ўз мавқейини мустаҳкамлашини айтди.
Шунингдек, 9 январь куни бўлиб ўтган ким ошди савдосида Alibaba акцияларининг қўшимча қўллаб-қувватланиши унинг асосчиси Жек Ма томонидан Хитойнинг финтеч гиганти Ant Group устидан назоратни йўқотиши билан таъминланди.
Ма компаниянинг назорат пакетига эгалик қилган, бироқ Пекин босими остида ўз улушини 6,2 фоизгача камайтиришга мажбур бўлган. Расмийлар ва миллиардер ўртасидаги қарама-қаршилик 2020 йилда, Хитой регуляторининг даъволари туфайли Антнинг ИПОси тўхтатилганда бошланган, кейинчалик унинг қарори Ма томонидан танқид қилинган. 2021 йил октябрь ойида экспертлар ҳисоб-китоб қилишларича, натижада миллиардер ўз бойлигининг учдан бир қисмини (36 фоиз) йўқотган.
Корпоратив назоратни ўзгартириш Ant Group листингга қўшимча вақт талаб қилсада, бу қарор ҳокимиятнинг тартибга солиш тизимини қайта ташкил этиш доирасида бошқарувни яхшилаш ниятини акс эттиради, деб таъкидлайди Bloomberg.