Хоразмда маош олмаётган имомларга ёрдам берилди

Хоразмда маош олмаётган имомларга ёрдам берилди

Фото: Қўшкўпир туманидаги «Аз Замахшарий» жоме масжиди

Бугунги пандемия шароитида маълумки, баъзи масжидлар ҳамон фаолиятини бошлагани йўқ. Жамоат намозлари вақтинча тўхтатилган. Уларда фаолият юритаётган имомлар ва масжид ходимлари деярли ойлик маошларисиз қолиб кетмоқда.

Шунинг учун бундай вақтда илм аҳлини, дин ходимларини ҳар томонлама қўллаб-қувватлаш, қийинчиликка дуч келаётганларга ёрдам кўрсатиш асосий эътибордаги масалалардан.

Ўзбекистон мусулмонлари идораси Масжидлар бўлимининг хабар беришича, Хоразм вилояти вакиллиги ташаббуси билан Ҳазорасп тумани «Сулаймон Боқирғоний» масжиди имом-хатиби Аминбой домла Раҳимов томонидан ҳомийларни жалб қилган ҳолда Хоразм вилоятидаги имом-хатиб ва имом-ноибларидан 41 нафарининг ҳар бирига карантин пайтида 480.000 сўмлик жами 19.680.000 сўмлик озиқ-овқат маҳсулотлари хайрия қилинди.

“Ушбу хайрия тадбири ташкилий ишларида жонбозлик кўрсатган Ҳазорасп тумани «Сулаймон Боқирғоний» масжиди имом-хатиби Раҳимов Аминбой ҳамда, эҳсон қилган ҳомий, биродаримиздан Аллоҳ рози бўлиб, эҳсонларини қиёматда бошларига соябон қилсин!” - дейилади идора хабарида.

Аҳли илмлар учун бу каби ғамхўрлик ишлари саховатпеша инсонлар ёрдамида юртимизнинг бошқа ҳудудларида ҳам имкониятлардан келиб чиқиб амалга оширилмоқда.

Бундан аввал карантин даврида Республикадаги 2 124 нафар имом-хатиб ва имом ноибига 1 миллиард 62 миллион сўм пул маблағлари молиявий ёрдам сифатида берилганлиги айтилган эди.