Япониянинг Toyota автомобилсозлик компанияси Санкт-Петербургдаги заводида Россиядаги ишлаб чиқаришни бутунлай тўхтатиш харажатларини ҳисоблаб чиқди – ҳисоб-китобларга кўра, автогигант 96,9 миллиард иена (650 миллион доллардан ортиқ) йўқотади. Бу ҳақда компания 30 сентябрда якунланган жорий молиявий йилнинг иккинчи чораги бўйича ҳисоботида маълум қилди.

"Йилнинг биринчи ярмида кўрилган йўқотишлар миқдорига кетган ходимларни ишдан бўшатиш харажатлари ва активларнинг қадрсизланиши билан боғлиқ харажатлар киради", деди Toyota бош бухгалтери Масаҳиро Ямамото матбуот брифингида.

Сентябрь ойи охирида компания мамлакатда 15 йилдан буён фаолият юритиб келаётган Санкт-Петербургнинг Шушари қишлоғидаги заводни ёпиш қарорини эълон қилди. Автомобиль ишлаб чиқарувчиси чакана савдо тармоқларини қўллаб-қувватлаш ва мамлакатдаги мижозларга хизмат кўрсатиш учун Москвадаги ваколатхонасини қайта қуришни режалаштирмоқда.

Октябрь ойи охирида Toyota йиллик ишлаб чиқариш белгиланган режадан кам бўлиши мумкинлигини тан олди. Компаниянинг 2023 йил мартида якунланадиган жорий молиявий йил учун камида 9,7 миллион автомобиль ишлаб чиқариш режалари яримўтказгич чипларининг глобал тақчиллиги туфайли барбод бўлди. Худди шундай муаммо Volvo'нинг фаолиятига ҳам таъсир қилди.