Украина президенти Владимир Зеленский бугун, 10 октябр куни Киевда украин ва халқаро журналистлар саволларига жавоб беради.

Матбуот марафони ноодатий тарзда, Kyiv Food Market озиқ-овқат бозори ҳудудида бўлиб ўтади. Марафонда қатнашиш учун 300 дан ортиқ журналист рўйхатдан ўтган бўлиб, улар бир нечта гуруҳларга ажратилган. Ҳар бир гуруҳ 7-10 кишидан иборат ва бир гуруҳдаги журналистларнинг саволларига 20-30 дақиқа вақт ажратилади.

Марафон айнан қанча вақт давом этиши ҳозирча номаълум, Украина президенти матбуот хизмати бу жараён 6-13 соат атрофида бўлиши ҳақида айтган. Таққослаш учун: Россия президенти Владимир Путиннинг ҳар йилги матбуот анжумани давомийлиги камдан-кам ҳолларда 4 соатга етади.

Зеленский қуйидаги саволларга аниқ жавоб бериши кутилмоқда:

– 2019 йил ёзида АҚШ президенти Доналд Трамп билан бўлиб ўтган ва кейинчалик можароларга сабаб бўлган суҳбат;

– яқинда Россия қамоқхоналаридан озод қилинган украин ҳарбийлари ва яна асир алмашиш эҳтимоли борми;

– Донбассда тинчлик ўрнатиш шарт-шароитлари;

– Зеленскийга яқин деб кўриладиган олигарх Игор Коломойский, маъмурият раҳбари Алексей Богдан ва бошқа амалдорлар ҳақидаги саволлар.

Матбуот марафонини YouTube ва Facebook орқали бевосита кузатиб бориш мумкин.