Afg‘oniston hukumati koronavirus bilan kasallanglarni davolash uchun 100 yil oldin qurilgan tarixiy saroydan foydalanishga qaror qildi. Bu haqda mamlakat sog‘liqni saqlash vaziri Feruziddin Feruz ma’lum qildi deb xabar bermoqda RIA Novosti.
Rasmiy ochilish marosimi shanba kuni bo‘lib o‘tdi.
Poytaxt Kobuldagi «Dorul omon» saroyi vaqtinchalik 200 o‘rinli shifoxonaga aylantirildi.
Feruzning qayd etishicha, saroyda kasallikning yengil simptomlari bilan og‘rigan bemorlar davolanadi.
Kobuldagi «Dorul omon» saroyi 1920 yillarda Germaniya va Fransiyadan taklif etilgan me’morlar tomonidan qurilgan.
Bir asrlik tarixida saroy Kobul hokimligi, jamoat ishlari vazirligi, mudofaa vazirligi hamda milliy muzey sifatida foydalanilgan.
2005 yildan beri rasmiy hukumat himoyasida.
Hozirda mamlakatda 933 nafar Covid-19 holati rasman tasdiqlangan. Ularning katta qismi Kobul hamda Hirot viloyatlari hissasiga to‘g‘ri keladi. Butunlay sog‘ayib ketganlar soni 112 nafarni tashkil etmoqda.
Afg‘oniston hukumati sog‘liqni saqlash vazirligiga $15 million ajratgan. Shuningdek, Jahon banki tomonidan $100 million mablag‘ ajratish va’da qilingan.