2019 yilda Afg‘onistonda tinch aholi orasida qurbonlar soni keskin ortdi. Odamlar asosan nizolashayotgan tomonlar o‘rtasidagi qurolli to‘qnashuvlar tufayli halok bo‘lmoqda va jarohat olmoqda. Bu haqa BMTning Afg‘onistonga ko‘mak missiyasining yangi hisobotida aytib o‘tilgan.
Joriy yilning to‘qqiz oyida Afg‘onistondagi nizo tufayli 2563 kishi halok bo‘ldi va 5676 kishi yaralandi. Shunga o‘xshash holat oxirgi bor 2014 yilda kuzatilgan edi. Mamlakatda oxirgi uch oy, ayniqsa iyul qonli kechdi.
“Tinch aholi o‘rtasida qubonlar soni rekord darajaga yetdi. Bu esa tomonlar tinch aholi himoyasiga ko‘proq e’tibor qaratishi, jumladan harbiy operatsiya o‘tkazish usullarini o‘zgartirishi kerakligini ko‘rsatadi”, – deydi BMTning Afg‘onistonga ko‘mak missiyasi rahbari Tadamichi Yamamoto.
Uning fikriga ko‘ra, tinch aholi qurbon bo‘lmasligining oldini olishning yagona yo‘li bor – o‘t ochishni to‘xtatish bo‘yicha muzokaralar o‘tkazish.