Qirg‘izistonning sobiq prezidenti Almazbek Atambayev quroldan foydalanish, ommaviy tartibsizliklarni tashkil etish, tergovga to‘sqinlik qilish, asirga olish, qotillik va qotillikka urinish kabi jinoyatlarda gumon qilinmoqda.
Almazbek Atambayevni qo‘lga olish operatsiyasi vaqtida qarshilik ko‘rsatgan uning tarafdorlariga nisbatan ham bir nechta sudga qadar tergov harakatlari boshlandi, deb xabar beradi «Kabar» agentligi.
Qirg‘iziston Milliy xavfsizlik davlat qo‘mitasi raisi Orozbek Opumbayev sobiq prezident davlat to‘ntarilishiga tayyorgarlik ko‘rganini ma’lum qildi. Atambayev o‘z uyida 500 kishi, asosan bolalar, ayollar va keksalarni to‘plashni maqsad qilgan.
Sobiq prezidentning uyidan nishonchi miltig‘i, to‘pponchalar, qurol-yarog‘ va o‘q-dorilar topilgan.
Eslatib o‘tamiz, Almazbek Atambayev 8 avgust kuni o‘tkazilgan maxsus operatsiya jarayonida o‘z qarorgohida qo‘lga olingan edi.